د هېواد د پوهنتونونو د معالجوي طب د تحصیلي نصاب د بیاکتنې او پراختیا دویم دور کلسټر په لوړو زده کړو وزارت کې په بریالۍ توګه پای ته ورسېد

۱۴۰۰کال، د کب ۵مه
د هېواد د پوهنتونونو د معالجوي طب د تحصیلي نصاب د بیاکتنې او پراختیا دویم دور کلسټر په لوړو زده کړو وزارت کې په بریالۍ توګه پای ته ورسېد. 
د لوړو زده کړو وزارت علمي معین دوکتور لطف الله خیرخواه د یاد کلسټر غړو ته په خطاب کې وویل: «تاسو د ټولنې لپاره یو بنیادي کار کوئ او ستاسو په لاس اصلاح شوی نصاب به د هېواد په پوهنتونونو کې تدریسږي.»
دغه راز نوموړي له دې امله خوښي وښوده، چې موږ په خپل هېواد کې د نصاب د اصلاح او جوړونې لپاره استادان او پوهان لرو او د یاد کلسټر له ټولو غړو یې د زړه له کومي مننه وکړه.  
په یاد کلسټر کې له اجنډا سره سم د معالجوي طب څلورو ډیسپلین او داخلې، جراحي، پارا کلنیک او بېسیک ساینس په څانګو کې، د 5 ورځو په جریان کې بحث وشو او د کلسټر په پای کې د ټولو کمېټو د کار پایلې توحید او د نهایي کېدو په موخه درېیم دور کلسټر ته ولېږدل شوې. 
د یادولو وړ ده چې په دغه کلسټر کې شاوخوا 154 کسانو ګډون کړی وو.