د افغان بیسیم مخابراتي شرکت تخنیکي ټیم له لوړو زده کړو وزارت سره د مخابراتي او ټکنالوژیکي اسانتیاوو هوکړې په اړه د دغه وزارت مالي او اداري معین او د مرکزي ادارو یو شمېر رئیسانو ته پرېزنټیشن وړاندې کړ.
په دغه پرېزنټېشن کې د افغان بیسیم مخابراتي شرکت تخنیکي ټیم د لوړو زده کړو وزارت کارکوونکو، د تحصیلي بنسټونو استادانو، محصلینو او د دیني جامعاتو فاضلانو لپاره د انټرنیټي خدمتونو، غږیزو کڅوړو، ځانګړو سیمکارټونو او د انلاین زده کړو سیسټمونو په برخو کې د اسانتیاوو رامنځته کولو پر څرنګوالي پرېزنټیشن وړاندې کړ.
د لوړو زده کړو وزارت مالي او اداري معین مولوي حافظ محمد حامد حسیب د یاد ټیم له پرېزنټېشن څخه مننه وکړه او ویې ویل چې د دغې هوکړې په پلي کولو سره به د لوړو زده کړو وزارت کارکوونکو، استادانو، محصلینو او د دیني جامعاتو فاضلانو د پام وړ اسانتیاوې رامنځ ته شي.
د یادونې وړ ده چې لوړو زده کو وزارت له افغان بیسیم مخابراتي شرکت سره څه موده وړاندې هوکړه لاسلیک کړې وه، چې د تعقیب او تطبیق چارې یې د لوړو زده کړو وزارت د معلوماتي ټکنالوژۍ ریاست په غاړه لري.
