د لوړو زده کړو سرپرست وزیر پنجشېر ولایت ته د خپل رسمي سفر په ترڅ کې د پنجشېر لوړو زده کړو موسسې څخه لیدنه وکړه.
د دې سفر موخه د پنجشېر لوړو زده کړو موسسې عمومي حالت ارزونه، د یادې موسسې د لیلیې جوړولو لپاره د ځای انتخاب، د تدریسي او روزنیزې پروسې ارزونه او د موسسې د مسوولینو، استادانو، کارکوونکو او محصلینو د ستونزو، نظرونو او وړاندیزونه اورېدنه وه.
د لوړو زده کړو سرپرست وزیر محترم شیخ الحدیث مولوي نداء محمد ندیم په دغه سفر کې د پنجشېر ولایت والي الحاج حافظ محمد آغا حکیم، د یادې موسسې استادانو، کارکوونکو او محصلینو سره په جلا جلا ناستو کې د پنجشېر لوړو زده کړو موسسې پراختیا، پرمختګ او ستونزو حل پر څرنګوالي خبرې وکړې.
په دغو ناستو کې د لوړو زده کړو سرپرست وزیر د علمي معیارونو ساتنې پر ارزښت، اداري نظم او د علمي څېړنو پر ملاتړ ټینګار وکړ. محترم شیخ صاحب د پنجشېر لوړو زده کړو موسسې محصلینو سره په لیدنه کې د هېواد په جوړونه کې د ځوانانو رول مهم وباله او له هغوی یې وغوښتل چې په ملي روحیه او له هېواد سره د مینې له مخې د علم زده کړه او هېواد د ودانولو هڅه وکړي.
د لوړو زده کړو سرپرست وزیر د یادو لیدنو په لړ کې د زده کړو پروسې، تدریسي امکاناتو، د استادانو علمي ظرفیت لوړونې او ستونزو په اړه د پنجشېر لوړو زده کړو موسسې مسوولینو، استادانو او محصلینو نظرونه او وړاندیزونه واورېدل او ژمنه یې وکړه، چې لوړو زده کړو وزارت به د خپلو شته امکاناتو په پام کې نیولو سره د ستونزو په حل کې لازم اقدامات وکړي.
د یادونې وړ ده چې د لوړو زده کړو سرپرست وزیر تېره اونۍ د تحصیلي نهادونو مسوولینو، استادانو او محصلینو د ستونزو حل، نظرونو او وړاندیزونو اورېدلو په پار، بدخشان، تخار، کندز، بلخ او هرات ولایتونو ته سفرونه وکړل.
نېټه: یکشنبه
۱۴۴۶، د ذوالحجې ۴مه
۱۴۰۴، د جوزا ۱۱مه
۲۰۲۵، د جون لومړۍ
