لوړو زده کړو سرپرست وزیر د هلمند له والي سره وکتل
د لوړو زده کړو سرپرست وزیر او علمي معین پوهنمل عبدالتواب بالاکرزي د هلمند له والي سره وکتل.
په دغه لیدنه کې، د هلمند ولایت مقام پر غوښتنو لکه پوهنتون ته د هلمند لوړو زده کړو موسسې ارتقا، د طب پوهنځي جوړول، د یو نړیوال علمي ژورنال رامنځته کول، د یادې موسسې لپاره د احاطې دیوال جوړول او د تحصیلي وضعیت ښه والي په اړه بحث او خبرې وشوې.
د هلمند والي تورن جنرال محمد یاسین د هلمند لوړو زده کړو موسسې د علمي کادر غړو د ظرفیتو لوړولو او د اقتصاد او شرعیاتو پوهنځیو رامنځته کولو په برخه کې د لوړو زده کړو وزارت له جدي پاملرنې مننه وکړه او په دغه ولایت کې یې د لوړو زده کړو کیفیت لا ښه والي لپاره خپل وړاندیزونه د لوړو زده کړو له سرپرست وزیر سره شریک کړل.
د لوړو زده کړو سرپرست وزیر او علمي معین پوهنمل عبدالتواب بالاکرزي، پوهنتون ته د هلمند د لوړو زده کړو موسسې د ارتقا، د معیاري علمي ژورنالونو پر ایجاد او هلمند لوړو زده کړو موسسې لپاره د طب پوهنځي د جوړیدو په اړه د هلمند والي د غوښتنو او وړاندیزونو تر اوریدو وروسته د وزارت اړوندو ادارو ته لارښوونه وکړه چې د اصولو او قوانینو په رڼا کې پر دې وړاندیزونو هر اړخیز کار وکړي او پایله یې د لوړو زده کړو وزارت له مقام سره شریکه کړي.
