د شپږ بنسټونو محصلين چې تر دې وړاندې يې طب پوهنځي لغوه شوي وو په تخفيف سره جذبېږي
د لوړو زده کړو یو شمیرخصوصي موسسو چې مخکې يې د طب د پوهنځيو جوازونه لغو اعلان شوي وو د طب په څانګو کې په ځانګړي تخفیف د محصلانو د منلو چمتووالی وښود.
د لوړو زده کړو وزارت د محصلانو د چارو معین پوهندوی سید فرهاد شهید زاده ، په داسې حال کې چې د خصوصي موسسو د محصلانو د چارو رئيس پوهنوال احمد ضیا یوسفزي هم حضور درلود، په ځانګړي تخفیف د محصلانو منل یو ډول عاطفي همکاري و بلله او له هغوی څخه يې وغوښتل چې د هېواد شرایطوته په کتو دې له دې محصلانو سره د غوره سلوک او حمایت لرونکی چلن وکړي.
شهید زاده زیاته کړه، د لوړو زده کړو وزارت تل د خصوصي پوهنتونونو او لوړو زده کړو موسسو څخه دفاع کول د اکاډمیکو لاروله پلوه د خپلو مکلفیتونو یوه برخه بللې او هڅه کوي چې په پوهنتونونو کې کیفیت د کمیت قرباني نکړي.
د خصوصي لوړو زده کړو موسسو د محصلانو چارو رئيس احمد ضیا یوسفزي هم د محصلانو د سوانحو او تبدیلۍ اخستلو د څرنګوالي په اړه معلومات ورکړل او ویې ویل چې د وخت د ضیاع د مخنیوي په خاطر پروسه ساده کیږي، محصلان به وکولای شي د خپلو لوړو زده کړو مسیر په عادي توګه پلی کړي.
د لوړو زده کړو هغه خصوصي موسسې چې محصلان يې په ځانګړي توګه منلي دي؛ د لوړو زده کړو ملي خصوصي موسسه، زاول، نعمان سادات، میهن، سپین غر او افغان – سویس د لوړو زده کړو موسسو څخه عبارت دي.
