شهرک رهایشی استادان، کارمندان و کارگران پوهنتون تخار تهداب گذاری شد
این شهرک از بزرگترین پروژه های ولایت تخار به شمار می رود که در محوطه زمین ملکیت پوهنتون تخار تطبیق می‌گردد.
شهرک رهایشی استادان، کارمندان و کارگران دانشگاه تخار با سپری نمودن مراحل قانونی و منظوری رئیس جمهور کشور در مرحله تطبیق رسیده که سر انجام سنگ بنای آن به زمین گذاشته شد.
در مراسم تهداب گذاری این شهرک پوهندوی خیرالدین خیرخواه رئیس پوهنتون تخار، مولوی عبدالله قرلق والی ولایت تخار، وفی الله رحمانی رئیس شورای ولایتی، انجنیر عزیزالرحمن رحمانی رئیس امور شهر سازی، مولوی عبدالصمد محمدی رئیس شورای علما، روسا و مسوولین ادارات دولتی، معاونین و اعضای رهبری پوهنتون، مسوولین نهادهای تحصیلی خصوصی تخار، استادان و کارمندان پوهنتون، اعضای جامعه مدنی، بزرگان قومی و شخصیت های متنفذ، جوانان و خبرنگاران شرکت نموده بودند.
با تطبیق شدن این پروژه، تخار دارنده‌ی یک شهرک معیاری خواهد شد که در آن همه امکانات و ملحقات شهری در نظر گرفته شده است.
