د لوړو زده کړو وزارت او د افغانستان د طبي عالي شورا ترمنځ د همکاریو هوکړه لیک لاسلیک شو
نن د لوړو زده کړو وزارت او د افغانستان د طبي عالي شورا ترمنځ د همکاریو هوکړه لیک لاسلیک شو.
د لوړو زده کړو وزیر ډاکتر عباس بصیر د دې هوکړه لیک موخه د طبي زده کړو د نظام ځواکمنتیا او د طبي سکتور د خدمتونو معیاري کول وښودل.
د لوړو زده کړو وزیر وویل :”سره له دې چې لوړو زده کړو وزارت د طبي زده کړو کیفیت ښه کول خپل مسئولیت ګڼي، خو یو ځواکمن طبي نظام ته رسېدل چې د یاد نظام اړتیاوې رفع کړي، د اړوندو ادارو همکارۍ ته اړتیا لري چې له نېکه مرغه نن د دې هوکړه لیک پر لاسلیکولو سره؛ ټاکل شوو موخو ته نږدې کېږو”.
هغه زیاته کړه، لوړو زده کړو وزارت د طبي سکتور د زده کړو په برخه کې ګامونه پورته کړي دي، خو د علمي څېړنو په برخه کې د لا زیاتو فعالیتونو اړتیا محسوسېږي چې کولای شي په دې برخه کې د افغانستان د عالي شورا ښه همکار اوسي.
همداراز په دې برخه کې د افغانستان د عالي طبي شورا ريیسې ډاکټر نسرین اوریاخېل د لوړو زده کړو وزارت له مخکینیو همکاریو څخه د ستاینې په ترڅ کې د دې هوکړه لیک لاسلیکول د هېواد د طبي نظام د معیاري کولو له پاره اغېزمن وباله.
هغې د لوړو زده کړو له وزیر وغوښتل چې د دې هوکړه لیک د موادو د پلي کولو په برخه کې یو تخنیکي ټيم ته دنده ورکړي څو په ګډه سره د دې هوکړه لیک د موادو له پاره هلې ځلې وکړي.
