د لوړو زده کړو وزارت اداري او ېربناوو نوی رییس معرفي شو
د لوړو زده کړو وزارت اداري او زېربناوو ریاست نوی رییس معرفي شو او د دغه ریاست د سرپرست کړنې وستایل شوې.
په دې ناسته کې د لوړو زده کړو وزارت مالي او اداري معین نور احمد دروېش د اداري او زېربناوو ریاست د سرپرست، سید نسیم سادات کړنې وستایلې او ویې ویل چې د سادات د خدمت په موده کې د اداري او زېربناوو په برخه کې د پام وړ لاسته راوړنې شوي دي.
نور احمد دروېش په اداري او زېربناوو ریاست کې د سید نسیم سادات د سرپرستۍ پر مهال د سختو هڅو له امله مننه وکړه او د دغه ریاست نوي رییس ته یې د بریا هیله وکړه.
همدارنګه د اداري او زېربناوو ریاست مخکیني سرپرست سید نسیم سادات د خپل خدمت په موده کې د لاسته راوړنو په اړه وینا وکړه او په بریالۍ توګه د پروګرامونو په پلي کولو کې یې د لوړو زده کړو وزارت له مشرتابه پلاوي او د دغه ریاست همکارانو ته کور ودانی ووایه.
وروسته اداري او زېربنا ریاست ته د نوي رییس په توګه د عبدالقادر دانشیار د ټاکلو کېدو له امله د لوړو زده کړو وزارت د بشري سرچینو رییس محمد مصطفی یونس زاد د جمهوري ریاست د مقام حکم ولوست.
د اداري او زېربناوو رییس انجنیر عبدالقادر دانشیار د لوړو زده کړو وزارت له مشرتابه پلاوي مننه وکړه او د یاد ریاست د کاري پرمختګ په پار یې خپلو پروګرامونو ته اشاره وکړه. دغه راز ژمنه یې وکړه، چې د وزارت د مقام له سپارښتنو سره سم او د دغه ریاست له کاري ټیم سره په همکارۍ او همغږۍ به د لوړو زده کړو وزارت د پروګرامونو په پلي کولو کې هېڅ ډول هڅې ونه سپموي.
د محفل په پای کې د لوړو زده کړو وزارت مقام او د دغه وزارت مالي او اداري معینیت له خوا د اداري او زېربناوو مخکني رییس سید نسیم سادات ته ستاینلیک ورکړل شو.
دغه راز د اداري او زېربناوو نوي رییس عبدالقادر دانشیار تر خپل کاري دفتر پورې بدرګه شو او په رسمي توګه یې په کار پیل وکړ.
