د لوګر لوړو زده کړو مؤسسې استادانو ته د (OBE-SCL) ترعنوان لاندې روزنیز ورکشاپ پیل شو
یاد ورکشاپ د لوړو زده کړو وزارت پراختیایي پروګرام (HEDP) لخوا، د لوګر لوړو زده کړو مؤسسې (۲۵) تنو نویو مقرر شویو استادانو ته، د دغه علمي بنسټ د مسلکي پراختیا مرکز (PDC) په تالار کې پیل شو.
د ورکشاپ په پرانېست غونډه کې؛ د لوګر لوړو زده کړو مؤسسې رئیس پوهنمل عبدالناصر ستانکزي په مقدماتي خبرو کې د دغه ورکشاپ پر اهمیت او اړتیاوو رڼا واچوله او زیاته یې کړه، چې په نني عصر کې د ټولې نړۍ پوهنتونونه د پایلو پر بنسټ ولاړ او د محصل محوري زده کړو (OBE-SCL) له میتودونو څخه ګټه اخلي.
نوموړي د ورکشاپ ګډونوال وهڅول څو د دغو فرصتونو څخه په استفادې د تدریس میتودونه په معیاري او عصري بڼه ترسره کړي او داسې محصلین ټولنې ته وړاندې کړي، چې مسلکي، متعهد او پرځان بسیا وي او وکولای شي چې په مختلفو برخو کې ټولنې ته ښه خدمتونه وړاندې کړي.
همدارنګه ښاغلي ستانکزي د ورکشاپ له تمویل کوونکي(HEDP) او د پکتیا پوهنتون له دو تنو استادانو هر یو پوهنیار سیف الرحمن روهي او پوهنیار معروف خان همدرد چې د دغه ورکشاپ ترینران دي، مننه وکړه .
د یادونې وړ ده، چې یاد ورکشاب د دو اوونیو لپاره په نظر کې نیول شوی او تر دې وړاندې هم د لوړو زده کړو وزارت پراختیا پروګرام (HEDP) لخوا د پوهنتون رهبري د پلان مطابق، د دغه علمي کانون استادانو ته ورته پروګرامونه په لاره اچول شوی وو.
