د لوړو زده کړو سرپرست وزیر لوګر د لوړو زده کړو مؤسسې څخه لیدنه وکړه او د یادې مؤسسې مسؤلینو او د لوګر مرستیال والي سره یې د مؤسسې د غونډو په تالار کې ناسته ترسره کړه.
د لوړو زده کړو وزارت سرپرست شیخ الحدیث مولوي نداء محمد ندیم صاحب د لوګر لوړو زده کړو مؤسسې مسؤلینو او د لوګر مرستیال والي سره په خپلو خبرو کې د پوهنتون د شته ستونزو د هواري ژمنه وکړه او همدارنګه یې د پوهنتونو د استادانو د امتیازاتو د لوړولو ډاډ ورکړ. محترم شیخ صاحب وویل، چې یاده موضوع یې د امیرالمؤمنین حفظه الله وروسته د ا.ا.ا د رئیس الوزرأ سره هم شریکه کړې، چې د نوي مالي کال په رارسېدو سره به د استادانو د نورو ډېری ستونزو سربېره د استادانو د معاشاتو د کم والي ستونزې هم هوارې شي.
د لوړو زده کړو سرپرست وزیر دغه راز زیاته کړه « د پوهنتونو هغه استادان چې د ځینو ستونزو پر بنسټ له هېواده بهر تللي، په پوره باور او ډاډ سره دې خپل هېواد او مسؤلیتونو ته را ستانه شي او په ګډه دې د هېواد د بچیانو په سالمه روزنه کې ونډه واخلي».
د لوګر لوړو زده کړو مؤسسې رئیس دوکتور شفیق الله شفقت د مؤسسې د ټولو مسؤلینو په استازولۍ د لوړو زده کړو سرپرست وزیر ته ښه راغلاست ووایه او یادې مؤسسې ته د هغه په ورتګ یې د خوښۍ څرګندولو ترڅنګ د لوګر لوړو زده کړو مؤسسې اړوند ستونزې له سرپرست وزیر سره شریکې کړې.
ورپسې د لوګر مرستیال والي مولوي عنایت الله شجاع هم په خپلو خبرو کې د لوړو زده کړو وزارت له مشرتابه څخه لوګر د لوړو زده کړو مؤسسې لپاره د شته ستونزو د هواري او هر اړخیزو مرستو او همکاریو غوښتنه وکړه، چې د لوړو زده کړو سرپرست وزیر شیخ الحدیث مولوي نداء محمد ندیم صاحب له لورې د ستونزو د حل کولو ډاډ ورکړل شو.
نېټه: چهار شنبه
۱۴۴۴/۵/۲۰هـ.ق ۱۴۰۱/۹/۲۳.ش ۲۰۲۲/۱۲/۱۴م
