د لوړو زده کړو سرپرست وزیر او ورسره مل پلاوي د کابل پوهنتون په علمي شورا کې د ګډون تر څنګ، د یاد پوهنتون له بېلا بېلو برخو څخه لیدنه وکړه.
د لوړو زده کړو سرپرست وزیر شیخ الحدیث مولوي نداء محمد ندیم صاحب، په داسې حال کې چې د دغه وزارت علمي معین دوکتور لطف الله خیرخواه هم حضور درلود، د کابل پوهنتون د مسؤلینو او استادانو فعالیتونه، لاسته راوړنې، ستونزې او وړاندیزونه واورېدل.
دغه راز د لوړو زده کړو سرپرست وزیر د کابل پوهنتون په علمي شورا کې وویل، چې د هېواد تحصیلي بنسټونو ته د سفرونو پر مهال مې له دوو طبقو؛ استادانو او علماء کرامو سره وکتل، چې دواړو طبقو د عصري او دیني علومو تر منځ د واټن ختمول غوښتل.
د لوړو زده کړو سرپرست وزیر زیاته کړه :«د استادانو له لوري د علم د پرمختګ او پوهنتونونو د تجهیز حرص ماته د لا زیات خدمت انرژي راکړه.» نوموړي د کابل پوهنتون د مسؤلینو او استادانو لاسته راوړنې او فعالیتونه وستایل او د یاد پوهنتون د ستونزو د حل او اړتیاوو پوره کولو ډاډ یې ورکړ.
وروسته د کابل پوهنتون رئیس دوکتور اسامه عزیز او علمي مرستیال پوهاند محمد شفیع شریفي د یاد پوهنتون د تاریخچې او لاسته راوړنو په اړه معلومات ورکړل او خپلې ستونزې او وړاندیزونه یې د لوړو زده کړو له سرپرست وزیر سره شریک کړل.
د یادولو وړ ده چې د لوړو زده کړو سرپرست وزیر د کابل پوهنتون د مسؤلینو په ملتیا د دغه پوهنتون له لابراتوارونو، عمومي کتابتون، انلاین سرچینو مرکز او نورو بېلا بېلو برخو څخه لیدنه وکړه.
نېټه: سه شنبه
۱۴۴۴/۶/۱۷هـ.ق ۱۴۰۱/۱۰/۲۰هـ.ش ۲۰۲۳/۱/۱۰م
