لوړو زده کړو سرپرست وزیر د مرکزي پوهنتونو یو شمیر متقاعدو استادانو سره ولیدل
د مرکزي پوهنتونو یو شمیر متقاعدو استادانو د لوړو زده کړو سرپرست وزیر اوعلمي مرستیال پوهنمل عبدالتواب بالاکرزي سره په لیدنه کې، د لوړو زده کړو موسسو علمي کادري غړو د معاش او امتیازاتو د نوې مقررې مطابق د خپل تقاعد د حقوقو د اداء کولو غوښتونکي شول.
د لوړو زده کړو سرپرست وزیر او علمي مرستیال پوهنمل عبد التواب بالاکرزي په پیل کې استادانو ته ښه راغلاست وویل او د استادانو د علمي خدمتونو له دورې څخه د یادونې او دا چې د کلونو زحمت او هڅو په اوږدو کې یې د هیواد څو نسلونو ته ښوونه او روزنه ورکړې ده، له هغوی څخه ستاینه وکړه او زیاته یې کړه چې د استادانو د هر ډول ستونزو د لرې کولو لپاره مرستې او لاسنیوي ته چمتو دی.
د لوړو زده کړو سرپرست د استادانو د وړاندیزونو له اوریدو څخه وروسته، له هغوی څخه وغوښتل تر څو د هغوی له منځه دوه تنه د ټولو متقاعدو استادانو په استازیتوب، معرفي کړي او د لوړو زده کړو وزارت د بشري سرچینو له څانګې سره په همغږۍ د اړوندو ادارو څخه د استادانو د وړاندیز د لاسته راوړلو لپاره یوه کمېټه تشکیل کړي، تر څو موضوع د یو ګډ طرزالعمل په ترڅ کې تر څیړنې او تحلیل لاندې ونیسي.
په پای کې پریکړه وشوه تر څو د متقاعدو استادانو له ډلې، د لوړو زده کړو وزارت د بشري سرچینو له ریاست او د کادري غړو د علمي تقرر او ترفیعاتو له ریاست، د ماليې او عدلیې وزارتونو له استازو څخه یوه کمېټه تشکیل شي چې د متقاعدو استادانو او د هغوی د وروسته پاتې کسانو د حقوقو په اجراآتو باندې په اساسي ډول سره فکر وکړای شي.
