د لوړو زده کړو د بنسټونو بیاکتنې ټیم، عملي کار پیل کړ
۱۴۰۰کال، د مرغومې ۱۲مه
د لوړو زده کړو د بنسټونو بیاکتنې ټیم، عملي کار پیل کړ.
په هېواد کې له ورستیو تحولاتو وروسته د لومړي ځل لپاره د لوړو زده کړو وزارت د تضمین کیفیت او اعتبار ورکونې ریاست له لوري، د مرکزي پوهنتونونو د علمي کادرونو په غړیتوب سره د بیاکتنې یو مسلکي ټیم جوړ او د ننګرهار د پوهنتونونو د بیاکتنې لپاره، هغه ولایت ته ولېږل شو.
د لوړو زده کړو وزارت د تضمین کیفیت او اعتبار ورکونې رییس شاکر وحیدي له یاد مسلکي ټیم سره د ناستې پر مهال، د لوړو زده کړو بنسټونو د کیفیت لوړولو، روڼتیا او څارنې په اړه خبرې وکړې او د دغه ریاست د اعتبار ورکونې د معیارونو پر پلي کولو یې ټینګار وکړ.
د لوړو زده کړو وزارت یاد مسلکي پلاوي ډاډ ورکړ، چې د لوړو زده کړو بنسټونو د کیفیت لوړولو لپاره به پوره هڅه وکړي.
په پام کې ده چې دغه مسلکي پلاوی به د ننګرهار دوه خصوصي تحصیلي بنسټونه، د بیاکتنې په پروسه کې د ګډون او د هغو د معیارونو د پلي کولو په موخه وګوري.
