د لوړو زده کړو سرپرست وزیر د شیخ زاید پوهنتون د پوهنځیو رئیسانو سره ناسته ترسره کړه.
د لوړو زده کړو سرپرست وزیر الحاج مولوي عبدالباقي حقاني د شیخ زاید پوهنتون د ټولو پوهنځیو رئیسانو او د یاد پوهنتون تدریسي روغتون له مسؤلینو سره ناسته ترسره کړه او په پوهنتون کې د تدریسي پرمختګ او پیاوړتیا په موخه یې د هغوی ستونزې او غوښتنې واورېدې.
سرپرست وزیر په یاده ناسته کې وویل:« د هرې برخې کارکوونکي د اړوندو برخو په مشکلاتو او هغو ته د حل لارو پیدا کولو لپاره تر نورو ښه پوهېږي، د تحصیلي بنسټونو استادان باید علمي طرحې له وزارت سره شریکې کړي، داسې طرحې چې له مخې یې کار ته خلک پیدا کړو، نه خلکو ته کار.»
ښاغلي حقاني همدا راز یادونه وکړه: « چې د افغانستان په تحصیلي برخو کې ستونزې او نېمګړتیاوې مو درک کړي دي او په تېر یو کال کې مو د دغو ستونزو د حل او نېمګړتیاوو پوره کېدو په موخه بېلابېلو هېوادونو ته سفرونه وکړل او ترڅنګ مو په داخل کې د نړیوالو مؤسسو او نهادونو له استازو سره ناستې کړي، چې زیاترو یې مثبت ځواب ویلی او په دې برخو کې پرمختګونه شوي دي.»
په یاده ناسته کې د شیخ زاید پوهنتون د پوهنځیو رئیسانو د لوړو زده کړو سرپرست وزیر ته د ا.ا.ا له حاکمیت وروسته د دغه پوهنتون لاسته راوړنې واورولې او ترڅنګ یې په پوهنتون کې د (څېړنو زیاتوالي لپاره د تشکیل، په دې پوهنتون کې د ماسټرۍ برنامې د ایجاد، د دوکتورا او ماسټرۍ بورسونو زیاتوالي او ورته نورې بېلابېلې غوښتنې وکړې.)
الحاج مولوي عبدالباقي حقاني د شیخ زاید پوهنتون د پوهنځیو رئیسانو ته ډاډ ورکړ، چې د دوی غوښتنې به د وزارت امکاناتو ته په کتو پوره او د لا غوره خدماتو برابرولو لپاره به هڅې وکړي.
