د خصوصي لوړو زده کړو موسسو د اکاډمیکو چارو د تقنيني سندونو د معرفي او توضيح، کلسټر جوړونې او موجوده وضعیت د تحلیل ورکشاپ پای ته ورسید
د اکاډمیکو چارو د تقنیني سندونو د معرفي او توضیح، کلسټر جوړونې او د خصوصي لوړو زده کړو موسسو د موجوده حالت د څېړلو دوه ورځنی ورکشاپ پای ته ورسید.
په دې ورکشاپ کې د ۲۷ دولتي پوهنتونو او ۱۲۸ خصوصي پوهنتونو او لوړو زده کړو موسسو معاونانو ګډون کړی و.
د لوړو زده کړو وزارت د محصلانو چارو معین پوهندوی سیدفرهاد شهید زاده د دې ورکشاپ جوړیدل او د ۱۵۵ دولتي او خصوصي علمي بنسټونو د علمي معاونانو ګډون د علم او پوهې د تولید او ودې په لاره کې د یو ښه تعاملي فرهنګ د بنسټیز کیدو په موخه یو ارزښتمن ګام وباله او ویې ویل چې ټول دولتي او خصوصي پوهنتونونه باید خپلو مشترکو علمي موخو او آرمانونو ته په کتو سره په عملي بڼه یو له بل سره همکار او همغږي پاتې شي.
پوهندوی شهیدزاده د ټولو تحصیلي بنسټونو د موخو پر یووالي د ټینګار تر څنګ، په ټولو علمي برخو کې د دولتي او خصوصي لوړو زده کړو بنسټونو په وسیله ددغو بنسټونو د پرمختګ لپاره مثبت تعامل او چلند او رغنده همکاري یوه جدې اړتیا وبلله او د یادو بنسټونو تر منځ یې په علمي او با ارزښته اړیکو درلودلو ټینګار وکړ.
د لوړو زده کړو وزارت د محصلانو چارو معین د هیواد په پوهنتونو کې د کرنتین څخه وروسته د حضوري درسونو د پیلیدو له امله د خوښۍ اظهار وکړ او ویې ویل، چې لوړو زده کړو وزارت د حضوري زده کړو د طرحې د موادو پر مټ، هغو بنسټونه چې د (HELMS) له سیسټم او د خپلو معیاري سیسټمونو څخه په مؤفقانه ډول توانیدلي دي چې آنلاین درسونه په سمه توګه خپلو محصلینو ته وړاندې کړي، مکلف دي چې د ۸ اونیو په اوږدو کې خپل حضوري درسونه بشپړ کړي او که چیرې محصلان په دې نه وي توانیدلي چې په مستمر او مؤثر ډول له دغه سیسټم څخه ګټه پورته کړي، یاد تحصیلي بنسټونه مکلف دي چې تر ۱۰ اونیو پورې خپلو حضوري درسونو ته دوام ورکړي.
نوموړي همدارنګه په ډاګه کړه، هغه تحصیلي بنسټونه چې په مؤفقانه توګه یې له آنلاین سیسټم څخه ګټه نه ده پورته کړې، د ۱۶ اونیو حضوري درسونو په تطبیقولو مکلف دي.
د لوړو زده کړو وزارت د اکاډمیکو چارو د څارنې او ارزونې رئیس پوهنمل دوکتور محمد ولي حنیف، ددغه ورکشاپ موخه په اوس مهال او راتلونکي کې د لوړو زده کړو وزارت د علمي پروګرامونو معرفي وبلله او زیاته یې کړه چې د تقنیني سندونو، طرزالعملونو تدوین او توضیح، زموږ لاسته راوړنې او ستونزې، علمي او اداري حل لارې، په خصوصي پوهنتونو او لوړو زده کړو موسسو کې د علمي کادر غړو د تقرر او ترفیعاتو د میکانیزم څیړنه، د کلسټر جوړونې پروګرام بشپړول او د دولتي او خصوصي پوهنتونو د علمي پروګرامونو او د کیفیت د تضمین او اعتبارورکونې د څیړنې په موخه په یو وخت کې د دغو بنسټونو د ګډون او مشارکت له امله د دولتي او خصوصي پوهنتونو تر منځ د تفاهملیک امضاء کول له هغو مهمو موضوعاتو څخه وو چې ددغو دوو ورځو په اوږدو کې ورباندې خبرې وشوې.
په پای کې د لوړو زده کړو وزارت د محصلانو چارو معین پوهندوی سید فرهاد شهیدزاده ګډون والو ته تصدیق پاڼې وویشلې.
