د پروان په پوهنتون کې د یوه زدکړیال نوښت وستایل شو
د پروان پوهنتون ښوونې او روزنې پوهنځي د فزیک ډیپارټمنټ درېیم کال زدکړیال حزب الله له خپلو کمو اسانتیاوو څخه په ګټې وتوانېد چې واټرپمپ، د جامو وینځلو ماشین او اوبو اېشوونکې (آب ګرمي) جوړه کړي، او وايي چې دا تخنیک یې له خپلو استادانو څخه د عملي کارونو په بهیر کې زده کړی دی.
یاد زدکړیال خپلې یادې درې وسیلې د پوهنتون مشرتابه پلاوي په شتون کې نندارې ته وړاندې کړې.
پوهندوی محمد رفیق سعیدي د ښوونې او روزنې پوهنځي فزیک ډيپارټمنټ آمر وايي چې حزب الله د فزیک څانګې د درېيم ټولګي یو فعال زدکړیال دی او د بريښنايي ماشینونو له جوړولو سره ډېره مینه لري.
پوهنیار شمس الحق روحاني د ښوونې او روزنې پوهنځي مشر وايي، په داسې حال کې چې د ښوونې او روزنې پوهنځي لابراتوارونه ډېرو وسایلو ته اړتیا لري خو بیا هم د بیولوژي، فزیک او کیمیا څانګو ډېری زدکړیالانو د استادانو په لارښوونې له لابراټوار څخه اغیزناکې ګټې اخیستي دي.
