« د افغانستان په ځان بسیاینه کې د پوهنتونونو ونډه» دوه ورځنی ملي کنفرانس پای ته ورسېد.
د یاد کنفرانس د پای په مراسمو کې د لوړو زده کړو وزارت علمي مرستیال دوکتور لطف الله خیرخواه د کنفرانس عمومي ارزونه وکړه، او مثبت یې ارزیابي کړ، هغه له ټولو استادانو، څېړونکو، د کنفرانس له تنظیموونکو او امنیتي مسؤلینو مننه وکړه.
علمي مرستیال زیاته کړه: «هڅه مو دا ده چې پوهنتونونه د هېواد په مسایلو کې ښکېل کړو، څو خلک پوه شي چې د هرې موضوع په اړه فکر، علم او لیدلوری په پوهنتونونو کې دی».
هغه همدارنګه وویل، چې د نړۍ چټک پرمختګ او د افغانستان وضیعت ته په کتو باید د ستړیا احساس ونکړو او د وخت له غوښتنو سره سم مزل وکړو.
ورپسې د کندز پوهنتون د څېړنو مرستیال پوهنوال دوکتور خیبر سیفي د کنفرانس د څرنګوالي عمومي راپور وړاندې کړ او همدارنګه د ننګرهار پوهنتون علمي مرستیال پوهندوی احسان الله ناصح د ګډونوالو په استازولۍ خبرې وکړې او د کندز پوهنتون د مسؤلینو او کارکوونکو له مېلمه پالنې څخه یې مننه وکړه.
په پای کې دغه دوه ورځنی ملي کنفرانس استادانو، د پوهنتونونو مسؤلینو او د کنفرانس ونډه والو ته د تصدیقونو، تندیسونو او مننلیکونو په ویشلو سره پای ته ورسېد.
نېټه: یکشنبه
۱۴۴۶هـ.ق د ربیع الثاني ۲۴ مه
۱۴۰۳هـ.ش د عقرب ۶ مه
۲۰۲۴ م د اکتوبر ۲۷
