د «تعلیم الاسلام» کتاب سیالۍ پایلې اعلان او اول مقام ګټوونکی به عُمرې ته ولېږل شي!
د مرکزي پوهنتونونو د «تعلیم الاسلام» کتاب لوستنې تر سره شوې ازموینې پایلې اعلان او محصلینو ته بېلا بېلې ډالۍ ورکړل شوې.
څه موده وړاندې د لوړو زده کړو وزارت د محصلانو د خدمتونو او همغږۍ ریاست له لوري د مرکزي پوهنتونونو شاوخوا پنځه زره محصلینو څخه د تعلیم الاسلام کتاب لوستنې ازموینه واخیستل شوه، چې تېره ورځ یې په کابل پوهنتون کې د لوړو زده کړو وزارت د رهبرۍ په حضور کې پایلې اعلان او ممتازه ګډونوالو ته بېلا بېلې ډالۍ ورکړل شوې.
په همدې موخه جوړو شویو مراسمو کې د لوړو زده کړو سرپرست وزیر محترم شیخ الحدیث مولوي نداء محمد ندیم وویل چې الله تعالی افغانستان ته داسې استعدادونه ورکړي، چې ما ته یې ډېره انرژي او حوصله راکړه. نوموړي زیاته کړه چې زموږ موخه دا ده چې محصلین مو د عصري زده کړو تر څنګ، دیني علم هم زده او د خپل دین په اساساتو پوه شي.
د لوړو زده کړو سرپرست وزیر محصلینو ته په خطاب کې وویل: «د هېواد ابادي علم ته اړتیا لري، خپلو زده کړو ته دوام ورکړئ او د خپل علم له لارې هېواد ته د خدمت جوګه شئ.» هغه وویل چې د انسان د ژوند او شرافت ساتنه په اسلام کې ده او اسلامي علوم د مسلمان لپاره تر خوراک او څښاک هم ډېر اړین دي، ځکه د ژوند ټولې چارې یې ورپورې تړلي دي.
وروسته د چارو ادارې لوی رئیس شیخ الحدیث نورالحق انور د علم پر ارزښت خبرې وکړې او د اسلامي نظام تر چتر لاندې یې د داسې برنامو پر جوړولو خوښي وښوده.
همدارنګه د لوړو زده کړو وزارت د محصلانو د خدمتونو او همغږۍ رئیس استاد کلیم الله محمدي وویل چې د تعلیم السلام کتاب لوستنې موخه د محصلینو دیني معلوماتو زیاتول، په محصلینو کې د مطالعې فرهنګ رایجول او د محصلینو تر منځ د سالم علمي رقابت رامنځ ته کول دي.
د مراسمو په پای کې د سیالۍ اول مقام ګټونکي ته د عُمرې حج، له دویم تر لسم مقام ګټونکي ته لپټاپ کمپیوټر، له یوولسم تر شلم مقام ګټونکي ته ایپډ او له یو ویشتم تر پنځوسم مقام ګټونکي ته بېلا بېلې ډالۍ ورکړل شوې.
د یادونې وړ ده چې لوړو زده کړو وزارت تر دې مخکې د ننګرهار او لغمان پوهنتونونو له محصلینو د تعلیم الاسلام کتاب لوستنې رقابتي ازموینې اخیستې وې او د هېواد په نورو تحصیلي بنسټونو کې هم د ورته ازموینو او سیالیو پلان لري.
نېټه: یکشنبه
۱۴۴۶هـ.ق د ربیع الثاني ۲۴ مه
۱۴۰۳هـ.ش د عقرب ۶ مه
۲۰۲۴ م د اکتوبر ۲۷
