د افغان نړیوال پوهنتون د شرعیاتو فوق لېسانس برنامو د تحصیلي نصاب ترتیب او چمتو کولو کلستر پیل شو.
په همدې موخه جوړه شوې غونډه کې د لوړو زده کړو سرپرست وزیر الحاج مولوي عبدالباقي حقاني، د لوړو زده کړو وزارت علمي معین دوکتور لطف الله خیر خواه ، د لوړو زده کړو وزارت د تحصیلي نصاب رئیس عبدالرؤف فراهي، د ملي نصاب غړو، د هېواد بېلابېلو تحصیلي بنسټونو مسلکي غړو او استادانو ګډون کړی وو.
د غونډې په پیل کې د لوړو زده کړو وزارت د تحصیلي نصاب رئیس عبدالرؤف فراهي ګډونوالو ته ښه راغلاست ووایه، د جوړې شوې برنامې په اړه یې هر اړخېز معلومات وړاندې کړل او زیاته یې کړه،" د نصاب بیا کتنه په ټولو هېوادونو کې یوه ملي او بنسټېزه موضوع وي، نصابونه که په هر هېواد کې وي بیا کتنې اپډيټ او پراخوالي ته اړتیا لري."
ورپسې د لوړو زده کړو وزارت علمي معین دوکتور لطف الله خیرخوا وینا وکړه او ویې ویل، " داچې نصاب د یوه هېواد پر ځان بسیا کېدو پر لور یو ګام دی، داسې نصاب ترتیب شي، چې ملي او دیني ارزښتونه په کې په نظر کې نیول شوي وي، داخلي او بهرني انتقادونه پرې ونشي او اوسنیو ستونزو ته ځواب ویونکی اوسي."
د لوړو زده کړو سرپرست وزیر الحاج مولوي عبدالباقي حقاني بیا د یاد کلستر پر جوړېدو خوښي څرګنده کړه او ویې ویل، " د هېواد ابادي په تحصیلي بنسټونو پورې او تحصیلي بنسټونه بیا په ښو نصابونو پورې اړه لري."
ښاغلي حقاني زیاته کړه، " موږ له پیل څخه دې برخې ته متوجه یوو، چې د هېواد نصاب مو د نړیوالو اصولو سره سم او په هره برخه کې پوره وي."
سرپرست وزیر دا هم وویل، "د نړۍ هغه هېوادونه چې د افغانستان په تحصیلي برخه کې لیوالتیا لري، موږ په دې هڅه کې یوو چې را دعوت یې کړو؛ ترڅو پوهنتونونه مو نړیواله بڼه غوره کړي، چې په دې برخه مو یو شمیر هېوادونو ته سفرونه وکړل او دا لړۍ به دوامداره ساتوو."
محترم حقاني د شرعیاتو فوق لېسانس برنامې د کلستر له غړو وغوښتل، چې د نصاب په ترتیب او چمتو کولو کې له پوره دقت او حوصلې څخه کار واخلي؛ ترڅو یو ګټور نصاب برابر شي.
دغه راز د غونډې په وروستیو کې د ملي نصاب غړي پوهندوي داؤد شاه فاروق د دغه کلستر پر کاري پروسي معلومات وړاندې کړل او د ګډونوالو پوښتنو ته یې ځوابونه ورکړل.
په دې وروستیو کې د لوړو زده کړو وزارت د طب، ساینسي، فارمسي، ویترنري، کمپیوټر ساینس پوهنځیو، د تخصصاتو پنځه برنامو او د افغان نړیوال پوهنتون د درې فوق لېسانس برنامو لپاره د نصاب بیا کتنه، ترتیب او د چمتو کولو چارې ترسره کړي دي او تازه یې د افغان نړیوال پوهنتون د شرعیاتو فوق لېسانس په برنامو کار پیل کړی دی.
