د تحصیلي بنسټونو د ښکلو هنرونو، ارواه پوهنې، اختصاصي او مسلکي زده کړو پوهنځيو اړوند څانګو د تحصیلي نصاب بیاکتنې او پراختیا درېیم پړاو کلسټر پیل شو.
د یاد کلسټر د پرانیستې په مراسمو کې د لوړو زده کړو وزارت علمي معین دوکتور لطف الله خیرخواه د هېواد پر تحصیلي نظام د ښوونې او روزنې څانګې اغېز او په ټولنه کې د علم په اړه د شته فکر پر بدلون خبرې وکړې.
نوموړي زیاته کړه: «تر څو چې د ښوونې او روزنې برخې ته اساسي پام ونه شي، معیاري تحصیلي نظام او غوره محصل لرل ناممکن دي.» د هغه په وینا؛ که څه هم په افغانستان کې ښوونه او روزنه اوږد تاریخ لري، خو بیا هم ډېرې ستونزې پکې دي، چې په مسلکي چلند او د ټولنې لیدلوري په تغیر سره یې اصلاح کولی شو.
د لوړو زده کړو وزارت علمي معین د ښکلو هنرونو څانګو پر ګټو خبرې وکړې او د دې څانګو له استادانو یې وغوښتل چې د یادو څانګو پر ارزښت او د ټولنې خلکو ته یې د ګټو په اړه معلومات ورکړي او هنر په ذاتي ډول خلکو ته وروپېژني.
وروسته د تحصیلي نصاب د ملي کمیسیون غړي پوهندوی داود شاه فاروق د کلسټر غړو پنځه ورځنۍ اجنډا په اړه معلومات ورکړل او ویې ویل چې په دې کلسټر کې به د یادو څانګو د نصاب جمع بندي، د متنونو کلي ترتیب او بیاکتنه، صحافت او ډیزاین وشي.
د یادونې وړ ده چې لوړو زده کړو وزارت څه موده مخکې «د افغانستان ښوونیزو او لوړو زده کړو بنسټونو پیاوړتیا ملي کنفرانس» تر عنوان لاندې کنفرانس دایر کړی و، چې پکې د ښوونې او رزونې متخصصینو او استادانو د هېواد ښوونې او رزونې او تحصیلي نظام پر ځواکمنتیا، پرمختګ او د ستونزو پر حلارو خپلې مقالې وړاندې کړې.
