د طبي همغږۍ ملي سمپوزيم افتتاح شو
د هېواد د روغتيايي سیسټم او د طبي لوړو زده کړو په سیسټم کې د مثبت بدلون د رامنځته کولو او خنډونو د لمنځه وړلو په موخه، نن په کابل کې د اړوندو ارګانونو د همغږۍ سمپوزيم جوړ شو.
د ياد سمپوزيم د پيليزې په مراسمو کې د ولسمشرۍ دويم مرستيال قانونپوه سرور دانش، په هېواد کې د روغتيايي خدمتونو د وضعيت په اړه خبرې وکړې او په افغانستان کې يې د روغتيايي خدمتونو د ښه والي په مناسبت د وړ لارو په موندنه ټينګار وکړ.
د لوړو زده کړو د محصلانو چارو معين پوهندوی سید فرهاد شهید زاده وويل: «دغه سمپوزيم د هېواد د جمهور رييس په حکم جوړ شو او په دې سمپوزيم کې د لوړو زده کړو او روغتیا وزارتونو، طبي عالي شورا، د پوهنتونونو د طبي برخو استادانو او متخصصينو ګډون کړی و.
پوهندوی شهيد زاده څرګنده کړه چې د دې سمپوزيم ګډون کوونکو د هېواد د روغتيايي خدمتونو د وړاندې کولو په سېستم کې د روغتيايي خدمتونو او خنډونو په اړه بحث او تجربې تبادله کړې څو د روغتيايي خدمتونو د کيفيت او انساني ځواک د توليد په برخه کې په وړ حل لارو سره مثبت بدلونونه راولي.
د لوړو زده کړو وزارت د محصلانو چارو معين زياته کړه چې په ياد شوي سمپوزيم کې د دې وزارت رول د درسي نصاب د بياکتنې، علمي څېړنو او په ټوله کې د طبي تحصيلاتو د وړاندې کولو د کيفيت د لوړوالي او پراختيا په برخه کې د کړنو او پروګرامونو وړاندې کول و او باور لري چې په دې سمپوزيم کې به د ځواکمن انساني ځواک په توليد او د روغتيايي خدمتونو د وړاندې کولو د کيفيت په لوړوالي کې به د یاد شوو ارګانونو همغږي، مثبتې اغېزې ولري.
