د عبدالله بن مسعود رضی الله عنه جامعې علمي شورا ناسته د لوړو زده کړو سرپرست وزیر په حضور کې ترسره شوه.
په پیل کې د عبدالله بن مسعود رضی الله جامعې رئیس مفتي احسان الله احسان د دغې جامعې د کړنلارې، فعالیتونو او لاسته راوړنو په اړه معلومات ورکړل او خپلې ستونزې او وړاندیزونه یې د لوړو زده کړو له سرپرست وزیر سره شریک کړل.
وروسته د لوړو زده کړو سرپرست وزیر شیخ الحدیث مولوي نداء محمد ندیم، په داسې حال کې چې د دغه وزارت د محصلانو چارو معین مفتي محمد طاهر احمد هم حضور درلود، په هېواد کې د معیاري دیني تخصصاتو پر ارزښت خبرې وکړې او ویې ویل چې پخوا دیني علومو ته ډېر پام نه ساتل کېده او په لوی لاس څنډې ته شوي وو.
نوموړي د یادې جامعې مشرتابه او استادانو ته د ستونزو د حل او وړاندیزونو په پام کې نیولو ډاډ ورکړ او هغوی ته یې د جامعې د پرمختګ او معیاري کولو په برخه کې لازمې لارښوونې وکړې.
