د لوړو زده کړو سرپرست وزير د وزارت په انګړ کې د یوه نيالګي په کينولو سره، افغانستان لپاره د ښیرازۍ، سولې او يووالي دعا وکړه
د لوړو زده کړو سرپرست وزیر او علمي مرستیال پوهنمل عبدالتواب بالاکرزي، پداسې حال کې چې د دې وزارت مرستیالانو او د مرکزي ادارو رئیسانو هم شتون درلود د نيالګيو کېنولو د دغه دوديز کمپاین پرانېسته وکړه او د ۱۳۹۹ کال د پسرلي د هرکلي په پار يې د افغانستان ټول ملت ته مبارکي وويله.
نوموړي د ټولو دولتي او خصوصي تحصیلي بنسټونو مسؤلینو، استادانو، زده کړيالانو او کارکوونکو ته لارښوونه وکړه ترڅو پخپل اکاډميک چاپېريال کې د يو نيالګي په کينولو سره د هېواد په زرغونتيا او پاکوالي کې خپل رول ولوبوي.
د لوړو زده کړو سرپرست وزير وويل: د ۱۳۹۸ کال په اوږدو کې لوړو زده کړو وزارت د تحصيلي نصاب پر بيا کتنه او پراختیا، د لوړو زده کړو قانون کې د لازمو تعديلاتو، پر تشکيلاتو او تقنيني اسنادو بيا کتنه، د علمي کادرونو د جذب پروسې په معياري کولو، د نويو رياستونو په رامنځته کولو، ۸۵% سلنه پراختیایي او ۹۹% سلنه عادي بوديجې په مصرفولو، په هېواد دننه او بهر علمي کادري غړو ته د ماسټرۍ او دوکتورا په برخه کې د اسانتياوو پر برابرولو، د اوبو او چاپېريال ساتنې د څېړنيز مرکز پر رامنځته کولو او نورو لسګونو پروګرامونو کار کړی، چې د لوړو زده کړو نظام لپاره يې ښې پایلې درلودلې دي.
پوهنمل بالاکرزي د نوي تحصيلي کال پلانونو او پروګرامونو ته په اشارې سره وویل، چې په تحصيلي نظام کې کیفیت او د علم تولید ته کار کول يې د لومړيتوبونو په سر کې ځای لري.
نوموړي دغه راز زیاته کړه: هيله ده د افغانستان ټول ملت له يو بل سره په پاک زړه، د سولې او امن په فضاء کې د خپل ژوند چارې مخته يوسي، څو وکړای شو لوړو علمي مدارجو ته ورسيږو او يو غوره تحصيلي نظام رامنځته کړو.
