د لوړو زده کړو سرپرست وزیر د هېواد زونونو دیني جامعاتو له رئیسانو سره وکتل او د یادو جامعاتو د کیفیت لوړونې پر څرنګوالي یې خبرې ورسره وکړې.
د لوړو زده کړو سرپرست وزیر محترم شیخ الحدیث مولوي نداء محمد ندیم په داسې حال کې چې د دغه وزارت مالي او ادري معین مولوي حافظ محمد حامد حسیب هم حضور درلود، په هېواد کې د دیني جامعاتو پر ارزښت، کیفیت لوړونه، نصاب، د استادانو علمي ظرفیت لوړونه او په دیني جامعاتو کې د فاضلانو لپاره د لا زیاتو اسانتیاوو پر رامنځ ته کولو خبرې وکړې.
د لوړو زده کړو سرپرست وزیر د دغه وزارت وروستیو فعالیتونو او لاسته راوړنو ته په اشارې سره وویل چې دغه وزارت هڅه کوي، څو د هېواد نورو تحصیلي بنسټونو تر څنګ، د دیني جامعاتو کیفیت لوړونې او پراختیا لپاره هر اړخیز اقدامات وکړي.
نوموړي له یادو مسؤلینو څخه وغوښتل چې خپلې طرحې، وړاندیزونه او ستونزې ورسره شریکې کړي، څو په دې برخه کې لازم اقدمات ترسره شي.
وروسته د هېواد دیني جامعاتو رئیسانو او رهبري پلاوي دیني جامعاتو ته د ا.ا.ا او لوړو زده کړو وزارت مشرتابه له پاملرنې څخه مننه وکړه، یو لړ غوښتنې او وړاندیزونه یې ورسره شریک کړل، چې د لوړو زده کړو سرپرست وزیر یې د حل او رسېدنې په برخه کې ژمنه وکړه.
نېټه: دوشنبه
۱۴۴۶هـ.ق د ربیع الثاني ۲۵ مه
۱۴۰۳هـ.ش د عقرب ۷ مه
۲۰۲۴ م د اکتوبر ۲۸
