د لوړو زده کړو سرپرست وزیر د کندهار پوهنتون له بېلا بېلو پوهنځیو څخه د ۱۵۰۰ محصلینو په فراغتغونډه کې ګډون وکړ.
د لوړو زده کړو سرپرست وزیر شیخ الحدیث مولوي نداء محمد ندیم صاحب د کندهار پوهنتون د محصلینو په فراغتغونډه کې وویل، چې په تحصیلي نصاب کې باید نوي پرمختګونه ورداخل او د ټولو دولتي او خصوصي تحصیلي بنسټونو لپاره واحد نصاب جوړ شي. نوموړي زیاته کړه چې موږ پر تحصیلي نصاب کار پیل کړی، تر څو د یوه معیاري تحصیلي نصاب په درلودلو سره د نړیوالو له احتیاج څخه راووځو.
همدارنګه د لوړو زده کړو سرپرست وزیر وویل چې موږ په خپل ټول توان سره د هېواد د تحصیلي نظام د پیاوړتیا لپاره کار کوو او هڅه کوو چې د استادانو او محصلینو د ظرفیت لوړونې لپاره له بهرنیو هېوادونو څخه تحصیلي بورسونه تر لاسه کړو.
د لوړو زده کړو سرپرست وزیر شیخ الحدیث مولوي نداء محمد ندیم صاحب د کندهار پوهنتون له فارغو شویو محصلینو څخه وغوښتل چې د خپل مسلک او پوهې له لارې خپل هېواد او خلکو ته خدمت وکړي. نوموړي محصلینو ته په خطاب کې وویل: «د هېواد راتلونکی جوړول ستاسو په لاس کې دی. ستاسو لپاره د کاري فرصتونو د ایجاد خبره به د وزیرانو په شورا کې شریکه کړم، تر څو د خدمت زمینه درته برابره شي.»
وروسته د لوړو زده کړو وزارت مالي او اداري معین مولوي حافظ محمد حامد حسیب فارغو شویو محصلینو ته د مبارکۍ تر څنګ، هغوی فوق الېسانس لوړو زده کړو ته راوبلل.
همدار راز په یاده فراغتغونډه کې د کندهار مرستیال والي مولوي حیات الله مبارک د کندهار پوهنتون له استادانو مننه وکړه چې په لوړو زده کړو سمبال ځوانان یې د ټولنې د خدمت لپاره وړاندې کړل.
د یادولو وړ ده چې غونډه فارغو شویو محصلینو ته د تصدیق پاڼو په ورکولو سره پای ته ورسېده.
نېټه: یکشنبه
۱۴۴۴/۵/۲۴هـ.ق ۱۴۰۱/۹/۲۷.ش ۲۰۲۲/۱۲/۱۸م
