د لوړو زده کړو سرپرست وزیر په علي آباد تدریسي روغتون کې د ۱۷ میلیونه افغانیو په ارزښت د درې پوړیزې ودانۍ جوړېدو ډبره کېښوده
د لوړو زده کړو سرپرست وزیر محترم شیخ الحدیث مولوي نداء محمد ندیم، د کابل طبي علومو پوهنتون مشرتابه پلاوي په ملتیا د د دغه پوهنتون اړوند په علي آباد تدریسي روغتون کې د یوې درې پوړیزې ودانۍ، چې د ناستو تالار، د پایوازانو انتظار خونه او د درملو ګدام به ولري، د جوړېدو ډبره کېښوده.
د یادې ودانۍ د جوړولو مالي لګښت د ملي سوداګر حاجي وحید حفیظي له لوري ورکول کېږي، چې چارې به یې په شپږو میاشتو کې بشپړې شي.
د لوړو زده کړو سرپرست وزیر له حاجي وحید حفیظي څخه د مننې ترڅنګ، له ناروغانو سره مرسته کول نوموړي لپاره د دنیا او اخرت ستر خیر یاد کړ او له نورو سوداګرو یې هم وغوښتل چې د خپل مظلوم ولس لاسنیوی وکړي.
محترم سرپرست وزیر زیاته کړه په د دې دونیا کې بریالی انسان هغه دی چې الله تعالی ورکړی استعداد د مخلوق په خدمت او خیر رسونه کې و کاروي.
د علي آباد تدریسي روغتون د مسؤلینو په وینا د یادې ودانۍ په جوړېدو سره به د دغه روغتون ډېرې ستونزې حل شي.
نېټه: چهارشنبه
۱۴۴۶هـ.ق د ربیع الثاني ۲۷ مه
۱۴۰۳هـ.ش د عقرب ۹ مه
۲۰۲۴ م د اکتوبر ۳۰
