د لوړو زده کړو سرپرست وزیر په میدان وردګ ولایت کې یوې سترې غونډې ته وینا وکړه او د وردګ لوړو زده کړو مؤسسې له مسؤلینو سره یې وکتل 

د لوړو زده کړو سرپرست وزیر محترم شیخ الحدیث مولوي نداء محمد ندیم میدان وردګ ولایت ته د رسمي سفر پرمهال په دغه ولایت کې یوې سترې غونډې ته، چې د یاد ولایت والي، د علماوو شورا رئیس، د جهادي مدرسې مهتمم او شیوخو کرامو، د ولایتي ادارو رئیسانو، د وردګ لوړو زده کړو مؤسسې مسؤلینو، استادانو او محصلینو ګډون پکې کړی و، خبرې وکړې.  

د لوړو زده کړو سرپرست وزیر په یاده غونډه کې د وردګ لوړو زده کړو مؤسسې استادانو ته وویل چې د محصلینو سالمه روزنه ستاسو په غاړه کې یو ستر امانت دی او ترې ویې غوښتل چې په اخلاص او د خپلو اولادونو په شان د محصلینو تدریسي بهیر ته پاملرنه وکړي. 

دغه راز نوموړي محصلینو ته په خطاب کې وویل چې د خپلو استادانو احترام وکړي، خپلو درسونو ته متوجه شي، زیار وباسي، د خپلو تخصصي زده کړو ترڅنګ، دیني زده کړو ته هم توجه وکړي او خپل ارزښتمن وخت ضایع نکړي. 

وروسته د میدان وردګ ولایت والي قاري بختیار معاذ تحصیلي نهادونو ته د لوړو زده کړو سرپرست وزیر سفرونه او له نږدې د هغوی د ستونزو اورېدل وستایل او زیاته یې کړه چې د دغو سفرونو په ترڅ کې تر ډېره د پوهنتون او مدرسې ترمنځ واټن راکم شوی دی. 

همدارنګه د لوړو زده کړو سرپرست وزیر په جلا جلا ناستو کې د اسلامي ثقافت او شرعیاتو پوهنځي له استادانو او د محصلینو له استازو سره وکتل، د هغوی ستونزې او وړاندیزونه یې واورېدل او د ستونزو د حل ډاډ یې ورکړ. 

سرپرست وزیر همدا راز د وردګ لوړو زده کړو مؤسسې په علمي شورا کې هم ګډون وکړ او د یادې مؤسسې د مسؤلینو یو شمېر غوښتنې یې منظورې کړې. 
نېټه: یکشنبه
۱۴۴۶هـ.ق، د جمادی الاول ۱۵مه
۱۴۰۳هـ.ش، د عقرب ۲۷مه
۲۰۲۴م، د نومبر ۱۷مه