د لوړو زده کړو سرپرست وزیر کندهار ولایت ته د خپل رسمي سفر په بهیر کې د جنوب لوېدیځ زون ولایتونو له علماء کرامو سره مشورتي ناسته وکړه.
په یاده ناسته کې، چې د کندهار پوهنتون د غونډو په تالار کې جوړه شوې وه، د لوړو زده کړو سرپرست وزیر شیخ الحدیث مولوي نداء محمد ندیم صاحب وویل چې علماء کرام باید ځانونه له نظام څخه بېل ونه بولي، د نظام تر شاه ودریږي او نېکې مشورې ورکړي. نوموړي زیاته کړه چې په نظام کې د علماء کرامو مشورې اورېدل کېږي او عمل ورباندې کېږي.
همدارنګه د لوړو زده کړو سرپرست وزیر د جنوب لوېدیځ زون ولایتونو له دیني علماء کرامو وغوښتل چې د لوړو زده کړو د پرمختګ او په هېواد کې د تحصیلي کچې د لوړولو په برخه کې خپلې نېکې مشورې ورسره شریکې او د تحصیلي سکټور د پیاوړتیا په برخه کې مرسته ورسره وکړي.
همدا راز د لوړو زده کړو وزارت مالي او اداري معین مولوي حافظ محمد حامد حسیب د علماء کرامو په راټولېدنه خوښي وښوده، هغوی یې د هېواد ستره معنوي پانګه وبلل او د مقام په اړه یې خبرې وکړې.
د کندهار مرستیال والي مولوي حیات الله مبارک د ټولنې د اصلاح په برخه کې د علماء کرامو رول ته اشاره وکړه او د علماء کرامو مسؤلیتونه یې مهم وبلل. دغه راز د جنوبي زون د تمیز محکمې رئيس شیخ مولوی سردار محمد زعفراني هم علماء کرام د ولس خدمت ته راوبلل او د پوهنتون او مدرسې د واټن پر ختمولو یې ټینګار وکړ.
وروسته د جنوب لوېدیځ زون کندهار، هلمند، زابل، غزني، دایکندي او ارزګان ولایتونو د علماء کرامو استازو په خپلو خبرو کې د لوړو زده کړو له سرپرست وزیر سره خپلې مشورې او وړاندیزونه شریک کړل او د لوړو زده کړو د پرمختګ او نظام د ټینګښت په برخه کې یې د پوره همکارۍ ډاډ ورکړ.
د یادونې وړ ده چې په دغه مشورتي ناسته کې د جنوب لوېدیځ زون شاوخوا ۷۰۰ علماء کرمو ګډون کړی و.
نېټه: دوشنبه
۱۴۴۴/۵/۲۵هـ.ق ۱۴۰۱/۹/۲۸.ش ۲۰۲۲/۱۲/۱۹م
