د لوړو زده کړو نوماند او سرپرست وزير د کاتب خصوصي پوهنتون د رهبري پلاوي سره ولیدل
لوړو زده کړو وزارت به د دولتي او خصوصي بنسټونو ترمنځ د سيالۍ اصل ته په کتو د دې بنسټونو ودې، د کیفیت پراختیا او علمي نوښتونو ته پاملرنه وکړي.
دغه مطلب د لوړو زده کړو سرپرست نوماند وزیر ډاکټر عباس بصیر د کاتب خصوصي پوهنتون د رهبري پلاوي له غړو سره په لیدنه کې څرګند کړ.
سرپرست وزیر د لوړو زده کړو وزارت د فعالیتونو او پروګرامونو د لرلید د څرګندولو په ترڅ کې وویل: ((د لوړو زده کړو د درېیم ستراتیژیک پلان د جوړېدو په بهير کې چې دا مهال تر کار لاندې دی هڅه کېږي څو د دې ادارې د پنځه کلن پروګرام پروسه چې د خصوصي او دولتي لوړو زده کړو موسسو د زده کړو د کیفیت د ښه کېدو په موخه ترسره کېږي د ظرفیت لوړولو غوره عامل شي.))
د لوړو زده کړو سرپرست وزیر زیاته کړه، د لوړو زده کړو وزارت د رهبرۍ لید لوری نسبت نورو دولتي او خصوصي بنسټونو ته پر کیفیت راڅرخي او د خصوصي او دولتي بنسټونو د اداره کوونکي سکتور له دریځ څخه خپل مسئولیتونه پېژني. ترڅو دغو بنسټونو ته د معنا لرونکې سیالۍ پر بنسټ د تعامل او همکارۍ زمینه یو ډول برابره کړي.
وروسته د کاتب پوهنتون ريیس علي احمد یوسفي د لوړو زده کړو وزارت د نوماند وزیر له نوو طرحو او لیدلوري هرکلی وکړ او د لوړو زده کړو وزارت له پروګرامونو يې خپل ملاتړ وښود او زیاته يې کړه چې کاتب پوهنتون تل د کیفیت لپاره هلې ځلې کړې دي او هڅه کوي چې لا نور هم د پوهې او معرفت مصدر شي.
هغه ټينګار وکړ چې کاتب پوهنتون د کيفيت د ښه والي او د لوړو زده کړو په حوزه کې د مثبت بدلون د راتګ له پاره د نظارت او علمي ارزښتونو د ترسره کولو په برخه کې د لوړو زده کړو وزارت له ټولو پروګرامونو ملاتړ کوي.
