د لوړو زده کړو وزارت او نړيوال بانک د استازو تر منځ په انلاين ډول د همغږۍ جلسه وشوه
د نړيوال بانک یو شمېر استازو په هېواد کې د تحصيلي چارو د ودې له پاره د لوړو زده کړو وزارت له رهبري ډلې سره د تحصيلاتي چارو د ودې، په دولتي او خصوصي تحصيلي بنسټونو کې د کيفیت د تضمين پر بنسټ يوه ويډيويي غونډه لرله او په دې اړه يې بحث وکړ.
په هېواد کې د تحصيلي نظام د ودې له پاره د يوې پلی کېدونکي لارښودې طرحې برابرول، د پراختيايي هدفونو د تحقق له پاره د خصوصی او دولتی تحصيلي بنسټونو تنظيم، په هېواد کې د لوړو زده کړو په برخه کې مېرمنو ته ونډې ورکولو د بهير چټکتیا او تر دې موضوع پورې نورې اړوندې چارې هغه عنوانونه وو چې په دې غونډه کې يې په اړه خبرې او بحث وشو.
د لوړو زده کړو وزير دوکتور عباس بصير، د هېواد د تحصيلي نظام د ودې په برخه کې د نړيوال بانک د هر اړخیزې همکارۍ مننه وکړه، د هېواد د پوهانو د يوه ملاتړي ارګان د جوړولو او همداراز د الکټرونيکي کتابتونونو د جوړولو او د محصلينو د کارولو د بهیر د اسانتیا له پاره يې د یوه مشخص پلتفارم د طرحې له پاره خبرې وکړې.
نوموړي همداراز په هېواد کې د خصوصي او دولتي تحصيلي بنسټونو د کمزوو ټکو د له منځه وړلو او د مثبتو ټکو د پياوړي کولو له پاره د دوی پر کړنو پرلپسې څارنه، له خپلو بنسټيزو چارو وبلله او د دې کتنې په پای کې دواړو لوريو د هېواد د تحصيلي وضعیت د ښه والي له پاره په پرلپسې همکاریو ټينګار وکړ.
