د لوړو زده کړو وزارت د خصوصي محصلانو رئیس په مشرۍ د دغه وزارت یوه پلاوي خوست ولایت ته د کاري سفر په جریان کې د دغه ولایت خصوصي تحصیلي بنسټونو څخه لیدنه او څارنه وکړه.
د لوړو زده کړو وزارت د خصوصي محصلانو چارو رئیس انجنیر سید اسماعیل روحاني په مشرۍ د دغه وزارت یوه پلاوي د خوست احمد شاه ابدالي (طبي)، پامیر او د طلوع افتاب مؤسسې خوست څانګې او همدارنګه د دعوت پوهنتون خوست څانګې علمي، اداري او تدریسي چارې له نیږدې وکتلې او د یادو تحصیلي بنسټونو د تدریسي چارو ارزونه یې وکړه.
د لوړو زده کړو وزارت د خصوصي محصلانو رئیس د یادو تحصیلي بنسټونو له مسؤلانو سره د لیدنې پر مهال د لوړو زده کړو وزارت پر قوانینو او طرزالعملونو ټينګار وکړ او له هغوی څخه یې وغوښتل چې د خپلو تدریسي چارو د معیاري کولو او غوره خدمتونو د وړاندې کولو په برخه کې لا ډېرې هڅې وکړي.
د یادولو وړ ده چې په دغه سفر کې د لوړو زده کړو وزارت د دعوت او ارشاد رئیس شیخ شاکرالله وحدت او د بشري سرچینو رئیس مفتي عبدالکریم امیري هم د انجنیر سید اسماعیل روحاني ملتیا کوله.
