د لوړو زده کړو وزارت د خصوصي محصلينو چارو رئيس او ورسره مل پلاوي تخار ولایت ته د کاري سفر په ترڅ کې ددغه پوهنتون د بېلابېلو څانګو او د ۱۴۰۱ کال لپاره د نویو محصلینو د جذب ظرفيت د ارزونې ترڅنګ د تخار والي سره هم ليدنه وکړه.

16/1/1444
23/5/1401

د لوړو زده کړو وزارت د خصوصي محصلينو چارو رئيس انجنیر سید اسماعیل روحاني په داسې حال کې، چې ددې وزارت مالي او حسابي رئيس عبدالباري خپلواک او د لوړو زده کړو وزارت د محصلانو د خدماتو د همغږۍ آمر انجنیر ویس الدین بریالي هم شتون درلود، د تخار پوهنتون د علمي کړنو د څرنګوالي، د کانکور له لارې د نویو محصلانو د جذب اداري ظرفيت او د تخار پوهنتون ستونزې له نژدي څخه وليدي.
یاد پلاوي په تخار ولایت کې د خپل دوه ورځني سفر په ترڅ کې، د پوهنتون له بېلابېلو فعالیتونو څخه کتنه وکړه او د علمي او اداري فعاليتونو د ښه والي او چټکتیا او د وزارت د تقنيني اسنادو د تطبيق په اړه د تخار پوهنتون مسؤلينو ته لازمې لارښوونې وکړي.
همدا راز یاد پلاوي د تخار پوهنتون د مشرتابه، استادانو او کارمندانو سره په ناسته کې د پوهنتون په علمي چاپيریال کې د اسلامي او ملي ارزښتونو په رعایت، د لوړو زده کړو وزارت د پاليسيو او برنامو د تطبيق او په تخار پوهنتون کې د محصلانو دجذب د څرنګوالي په اړه خبرې وکړي.
په همدې ترتیب د لوړو زده کړو وزارت پلاوي د لا زیاتي همغږۍ او په یاد ولایت کې د تحصیلي جریان څخه د ولایت د مقام ملاتړ په موخه د تخار والي الحاج محمد اسماعیل راسخ سره وکتل.
په دې کتنه کې دواړو خواوو د هيواد په پرمختګ او آبادۍ کې د تحصيل پر ارزښت او د هېواد د لوړو زده کړو د بنسټونو د پیاوړتیا په اړه خبرې وکړي. 
د تخار والي الحاج قاري محمد اسماعیل راسخ دغه ولایت ته د لوړو زده کړو وزرات د پلاوي له راتګ څخه د خوښيو څرګندولو ترڅنګ د تخار ولایت د تحصيلي سکتور د پیاوړتیا او پراختیا په برخه کې د هر ډول همکارۍ ډاډ ورکړ.