د لوړو زده کړو وزارت د زده کړیالانو چارو د معینیت شورا ناسته، د دغه وزارت د زده کړیالانو چارو د معینیت د سرپرست په مشرۍ تر سره او د وړاندې شوو مواردو په اړه بحث او نظرونه سره شریک شول

۱۴۰۰کال، د لړم ۹مه، لوړو زده کړو وزارت 
د لوړو زده کړو وزارت د زده کړیالانو چارو د معینیت شورا ناسته، د دغه وزارت د زده کړیالانو چارو د معینیت د سرپرست په مشرۍ تر سره او د وړاندې شوو مواردو په اړه بحث او نظرونه سره شریک شول. 
د ناستې په پیل کې د لوړو زده کړو وزارت د زده کړیالانو چارو سرپرست معین، له اړوندو ریاستونو وغوښتل، چې د دولتي او خصوصي تحصیلي بنسټونو د زده کړیالانو د ستونزو د حل او له تحصیلي بنسټونو سره په همغږۍ د هېواد ځوانانو لپاره د مناسبې تحصیلي فضا د برابرولو په برخه کې لازمې اقدامات تر سره کړي. 
وروسته له اجنډا سره سم د زده کړیالانو چارو د معینیت شورا غړو له لازمو بحثونو وروسته پرېکړه وکړه، چې د خصوصي تحصیلي بنسټونو د زده کړیالانو د تبدیلۍ په برخه کې، د خصوصي زده کړیالانو چارو ریاست یوه جامع طرحه ترتیب او په راتلونکې ناسته کې وړاندې کړي. 
همدارنګه په دغه ناسته کې هغه د خصوصي لوړو زده کړو بنسټونو زده کړیالان چې د ستونزو له  امله د ۱۴۰۰کال، پسرلي سمسټر له ازموینې پاتې دي، اړوندو خصوصي بنسټونو ته یې سپارښتنه  وکړه، چې د اضافي پیسو له اخیستلو پرته، هغو زده کړیالانو ته د ازموینې زمینه برابره کړي، چې کومه قانوني ستونزه نه لري. 
دغه راز د هغو خصوصي پوهنتونونو په اړه، چې د ناقانع کوونکو دلایلو پر اساس یې درسونه نه دي پیل کړي او له زده کړیالانو یې فیس هم اخیستی، سپارښتنه ورته وشوه، چې ډېر ژر زده کړیالانو ته د زده کړو زمینه برابره کړي او له هغې پرته دې د زده کړیالانو فیسونو او نور مادي حقوق بېرته ورکړل شي، تر څو وکولی شي، په نورو پوهنتونونو کې خپلو زده کړو ته دوام ورکړي.