د لوړو زده کړو وزارت رهبري شورا ناسته، د دغه وزارت سرپرست وزیر شیخ الحدیث مولوي نداء محمد ندیم صاحب په مشرۍ تر سره شوه.
د ناستې په پیل کې د لوړو زده کړو سرپرست وزیر په هېواد او نړۍ کې وروستیو پېښو ته په اشارې سره د هرات زلزلې قربانیانو او زیانمنو سره د مرستې راټولولو غوښتنه وکړه او د رهبري شورا له غړو یې وغوښتل چې د لوړو زده کړو وزارت له ټولو کارکوونکو څخه مرستې راټولې او د پېښې زیانمنو ته یې په وخت سره ورسوي.
نوموړي زیاته کړه: «د پېښې له پېښېدو سره سم مې د تحصیلي بنسټونو مسؤلینو ته سپارښتنه وکړه چې په هرات ولایت کې د زلزلې له زیانمنو لپاره مرستې راټولې کړي.»
دغه راز د لوړو زده کړو سرپرست وزیر په فلسطین کې د مجاهدینو د جهاد ستاینه وکړه، د هغوی د خپلواکۍ هیله یې څرګنده کړه او ویې ویل چې الله تعالی دې د فلسطین د مجاهدینو نصرت وکړي.
وروسته له اجنډا سره سم له پوهنیار څخه پوهنملۍ علمي رتبې ته د لېسانس استادانو د ترفیع پر څرنګوالي، له اصلي مؤلف څخه د ژباړن اجازه اخیستلو او مؤلف ته د پیسو ورکولو، د هغو محصلینو لپاره چې په پوهنتونونو کې ورته په مورنۍ ژبه د زده کړو زمینه نه ده برابره، د ژبې تقویتي کورسونو د ایجاد پر څرنګوالي، په امارتي پوهنتونونو کې د فوق لیسانس برنامو د ایجاد او د مرکزي او دویمي واحدونو په دفترونو کې د رسمي لیکونو د اجرا او ګړندي کولو په اړه بحثونه او لازمې پرېکړې وشوې.
دغه راز د استادانو، محصلینو او کارکوونکو د ستونزو اورېدو او د حل په موخه یې د وزارت تر مقام پورې رارسولو لپاره یوه کمېټه وټاکل شوه او پرېکړه وشوه، چې د تخصصاتو او دوکتورا برنامو په تحصیلي اسنادو کې باید د لوړو زده کړو سرپرست وزیر لاسلیک وکړي.
