د لوړو زده کړو وزارت علمي معین دوکتور لطف الله خیرخواه فدراتیف روسیې ته د خپل رسمي سفر په څنډه کې د تاتارستان هېواد د انرژۍ له پوهنتون څخه لیدنه وکړه.
د لوړو زده کړو وزارت علمي معین دوکتور لطف الله خیرخواه او ورسره مل پلاوي، چې تېره ورځ یې «د روسیې او اسلامي نړۍ» په څوارلسم نړیوال اقتصادي کنفرانس کې د ګډون په موخه روسیې ته سفر کړی و، نن یې د یاد کنفرانس په څنډه کې د تاتارستان هېواد د لوړو زده کړو وزارت د علمي معین «خیرولین رامېل کمیلو ویچ» په ملتیا د یاد هېواد د انرژۍ پوهنتون له مختلفو برخو څخه لیدنه وکړه.
نوموړي د یاد پوهنتون له مسؤلینو وغوښتل چې له افغانانو سره خپلې تجربې شریکې کړي او افغان محصلینو ته بورسونه ورکړي، چې د کوربه هېواد له لوري د هر ډول علمي او تحصیلي همکاريو ژمنه ورسره وشوه.
دغه راز په یاده لیدنه کې د دواړو اړخونو تر منځ پر ګډو څېړنیزو پروګرامونو، د دواړو هېوادونو تر منځ پر علمي سفرونو هم بحثونه وشول
