د لوړو زده کړو وزارت علمي معین ننګرهار ولایت ته د خپل کاري سفر په جریان کې د خراسان خصوصي پوهنتون له لوري د ورزش اونۍ په پرانیستې مراسمو کې ګډون وکړ.
په یادو مراسمو کې د خراسان خصوصي پوهنتون مشرتابه پلاوي، د ختیځ زون د بدنې روزنې رئیس، د ننګرهار د اطلاعاتو او کلتور رئیس، د ننګرهار او یو شمېر خصوصي پوهنتونونو مسؤلینو او همدارنګه د ګڼو نورو دولتي او غیرې دولتي ادارو رئیسانو او مسؤلینو ګډون درولود.
په یادو مراسمو کې د لوړو زده کړو وزارت علمي معین دوکتور لطف الله خیرخواه د خراسان پوهنتون دغه نوښت وستایه او د ذهنې رُشد ترڅنګ یې جسمي پیاوړتیا هم اړینه وبلله. نوموړي له ځوانانو وغوښتل چې په دې ډګر کې د خپل هېواد لپاره ویاړونه راوړي او د ورزش له لارې خپلو خلکو ته خدمت وکړي.
همدارنګه د خصوصي پوهنتونونو د اتحادیې عمومي رئیس او د خراسان پوهنتون مؤسس محترم دوکتور احمد طارق کمال د یادو مراسمو پر ارزښت خبرې وکړې او ویې ویل چې خراسان پوهنتون تل هڅه کړې چې د ځوانانو فکري او فزیکي روزنې او ودې په خاطر ورته پروګرامونه جوړ کړي.
په پای کې لوبغاړو په مختلفو برخو کې نندارې ترسره کړي، چې د مېلمنو او مینه والو د ستاینې او پاملرنې وړ وګرځېدل.
د یادولو وړ ده چې هر کال د خراسان پوهنتون له لوري دا ډول ورزشي پروګرام جوړیږي او ورزشکاران پکې ستایل کېږي.
