د لوړو زده کړو وزارت مالي او اداري معین په مشرۍ د وزارت د مرکزي ادارو او دویمي واحدونو (پوهنتونونو او لوړو زده کړو مؤسسو) د ۱۴۰۳هـ.ش کال تشکيلاتي جوړښت د بیاکتنې کمېټې ناسته وشوه.
د ناستې په پيل کې د لوړو زده کړو وزارت مالي او اداري معين مولوي حافظ محمد حامد حسيب د دغه وزارت تشکيلاتي جوړښت په اړه خبرې وکړې او ويې ويل، چې موږ پر داسې یوه تشکیل کار کوو، چې د هېواد د لوړو زده کړو چارې په سمه توګه تنظيم کړي، د دې وزارت اړوندو ادارو سیسټم او کاري بهیر ګړندې کړي.
نوموړي دغه راز د هېواد تحصیلي بنسټونو له رئیسانو او مسؤلينو څخه وغوښتل چې د اړتياوو او د هېواد شته امکاناتو ته په کتو خپل تشکيلاتي جوړښت تنظیم او يادې کمېټې ته يې واستوي.
ورپسې د لوړو زده کړو وزارت د تشکيلاتي جوړښت د بيا کتنې کمېټې غړو له اجنډا سره سم د هرات، جوزجان، بغلان، اروزګان او زابل تحصیلي بنسټونو د تشکيلاتي جوړښت په اړه تخنيکي بحث وکړ او د منظم او معیاري تشکیل په موخه یې اړوندو مسؤلینو ته لازمې لارښوونې وکړې.
د يادونې وړ ده چې د لوړو زده کړو وزارت د تشکيلاتي جوړښت د بيا کتنې کمېټې له څلورو ورځو راهيسې پر يادو تشکیلاتو کار پيل کړى او تر دې مهاله يې د ۲۱ تحصيلي بنسټونو تشکيلاتي جوړښت بشپړ کړى چې د دې وزارت د ټولو ادارو تشکیل به له بیا کتنې او اصلاح وروسته د تائید لپاره د معاشاتو او تشکیلاتو د تنظیم کمېسیون ته واستوي.