د لوړو زده کړو وزير د سيدجمال الدين افغان خصوصي لوړو زده کړو د موسسې له رهبري ډلې سره وکتل
د لوړو زده کړو وزير د سيد جماالدين افغان لوړو زده کړو خصوصي موسسې له استادانو او رهبري ډلې سره وکتل.
په دې ليدنه کې د يادې مؤسسې رهبري ډلې د لوړو زده کړو وزير ته د مبارکي ويلو ترڅنګ، د لوړو زده کړو د خصوصي موسسو پر وړاندې خنډونه لکه د ماليې لوړوالی، د استادانو د رتبو او د کادري غړو د تقاعد او امتيازاتو په اړه خبرې وکړې.
د لوړو زده کړو وزير دوکتور عباس بصير د يادې مؤسسې د استادانو او رهبري ډلې د ستونزو او نظرونو له اورېدو وروسته وويل چې د لوړو زده کړو وزارت د لوړو زده کړو د خصوصي سکتور د پياوړتيا له پاره په يو لړ پروګرامونو کار کوي څو له يوه لوري د لوړو زده کړو د بنسټونو د کمي او کیفي لوړتيا زمينه برابره شي او له بل لوري د هېواد د لوی پاړکي ځوانانو له پاره د زده کړو اسانتيا برابره شي.
نوموړي زياته کړه چې موږ هغه وخت کولای شو د لوړو زده کړو عالي پړاو ته ورسېږو چې پر زده کړو سربېره، پر دولتي او خصوصي لوړو زده کړو بنسټونو کې د څېړنې او تحقيق چارې هم بنسټیزې کړو او خپلې تګلارې په څېړنيزو چارو سره روانې کړو او په پايله کې وکولای شو ټولنې ته وړ کارونه وړاندې کړو.
همداراز د لوړو زده کړو وزير د دوی د غوښتنو په اړه وويل چې موږ به له دولتي او خصوصي سکتور څخه په ګډه د خصوصي سکتور د ستونزو د اواري له پاره يوه کمېټه جوړه کړو چې ستونزې په بنسټيزه توګه و ارزوي او د يادو سکتورونو د استازو په حضور به مطلوبو پايلو ته ورسېږو.
