د لوړو زده کړو وزیر د استانبول له مرمره پوهنتون څخه لیدنه وکړه
لوړو زده کړو وزیر ترکیې ته د خپل سفر په بهیر کې د استانبول مرمره پوهنتون څخه لیدنه وکړه او د دغه پوهنتون له مشرتابه پلاوي سره یې د اکاډمیکو همکاریو په هکله ویناوې وکړې.
په دې لیدنه کې لومړی پروفیسور دوکتور ایرول اوزوار د لوړو زده کړو وزیر دوکتور عباس بصیر او مل پلاوي ته ښه راغلاست ووایه او د استانبول مرمره پوهنتون، د دې پوهنتون فعالیتونو او په دغه اکاډمیک بنسټ کې کورنيو او بهرنيو زدکړیالانو ته د تحصیلي خدمتونو په هکله معلومات ورکړل.
ورپسې لوړو زده کړو وزیر د افغانستان پوهنتونونو او لوړو زده کړو موسسو په اړه معلومات ورکړل او د علمي، څېړنیزې اړیکو رول، د پوهې تبادل، د نویو تجربو ترلاسه کولو په موخه د استادانو او زدکړیالانو تبادل، تحصیلي بورسیو ورکړې، په یاد پوهنتون کې افغان زدکړیالانو ته د اړینو خدمتونه او اسانتیاوو وړاندې کول اړین وګنل او په دې اړوند د لا زیاتو همکاریو غوښتونکی شو.
همدارنګه د مرمره پوهنتون رییس د لوړو زده کړو وزیر ستاینې ترڅنګ د هر ډول همکارۍ ژمنه کړه او د افغانستان د پوهنتون لیدنې په هکله خپله لېوالتیا وښوده.
د لیدنې په پای کې دواړو خواوو یو بل ته ډالۍ ورکړې او لوړو زده کړو وزیر د استانبول مرمره پوهنتون له بېلابېلو برخو لیدنه وکړه.
