د لوړو زده کړو وزیر د غزني تخنیکي پوهنتون مخکنی رییس وستایه
د لوړو زده کړو وزیر ډاکټر عباس بصیر د غزني تخنیکي پوهنتون مخکېني رئیس پوهنیار ذبیح الله دانش ته د ستاینلیک په ورکولو سره په پوهنتون کې د دندې پر مهال یې لاسته راوړنې وستایلې.
پوهنیار ذبیح الله دانش د شپږو کلونو او اتو میاشتو لپاره د غزني تخنیکي پوهنتون د رئیس په توګه دنده ترسره کړې، او د علمي او پراختیايي پروګرامونو په طرحه او پلي کولو سره وتوانېد چې په دغه پوهنتون کې د خپل مسؤلیت او خدمت په موده کې مهمې لاسته راوړنې ثبت کړي.
د لوړو زده کړو وزیر ډاکټر عباس بصیر د پوهنیار دانش د علمي خدمتونو او هېوادپالنې احساس وستایه او هغه ته یې د دوکتورا په کچه د زده کړې د دوام او د لوړو زده کړو د کورنۍ په نورو څانګو کې د خدمت په برخه کې د بریالیتوب هیله وکړه.
پوهنیار دانش د لوړو زده کړو وزارت د مقام ستاینې څخه په مننې خپلې لاسته راوړنې د لوړو زده کړو وزارت مشرتابه پلاوي د پاملرنې او ملاتړ زېږنده وبللې او زیاته یې کړه چې د غزني تخنیکي پوهنتون د منځپانګې او زیربنایي پراختیا له اړخه ښه پرمختګ کړی او ډاډمن دی چې د لوړو زده کړو وزارت مشرتابه پلاوي په ښې رهبرۍ به د هېواد یو له تخنیکي اعتبار لرونکو پوهنتونو څخه شي.
