د هرات، فراه او بادغیس په امارتي تحصیلي بنسټونو کې د اداري بستونو د ډکولو په موخه له څه باندې ۵۰۰ نوماندانو رقابتي ازموینه واخیستل شوه.
د يادو شويو تحصيلي بنسټونو د اداري بستونو ازموينه نن د لوړو زده کړو وزارت د پلاوي او د هرات پوهنتون د مسوولينو په حضور کې په هرات پوهنتون کې واخيستل شوه.
د دغې ازموينې د پيل په مراسمو کې د لوړو زده کړو وزارت د اطلاعاتو، نشراتو او عامه اړيکو رئيس او د دغه ازموينې د بورډ رئيس انجنير روح الله روحاني د دغې ازموينې د اخيستلو د بهير په اړه خبرې وکړې، د دې پروسې د روڼتیا په اړه یې ګډونوالو ته ډاډ ورکړ چې ازموینه به په شفافه او عادلانه توګه ترسره شي چې پایله به یې د لوړو زده کړو وزارت د رسمي کمیټې له لارې اعلان شي.
همدارنګه د هرات پوهنتون رئیس شیخ الحدیث مفتي عبدالغفار د لوړو زده کړو وزارت پلاوي، د ازموینو نوماندانو او نورو ګډونوالو ته د ښه راغلاست ترڅنګ د اسلام په مبارک دین کې کار اهل کار ته د سپارلو پر ارزښت خبرې وکړې. ده وويل چې د دې ازموينې له لارې د هرات پوهنتون او د فراه او بادغيس لوړو زده کړو موسسو په اداري بستونو کې به وړ او مسلکي کسان وګومارل شي چې په پايله کې به خلکو ته باکيفيته او معياري خدمات وړاندې شي.
