د هېواد تحصیلي بنسټونو د ښوونې او رزونې پوهنځیو د ژبو او ادبیاتو څانګو د بیاکتنې او پراختیا دویم پړاو کلسټر پیل شو.
د یاد کلسټر په پرانیسته کې د لوړو زده کړو وزارت علمي معین دوکتور لطف الله خیرخواه ژبه د علومو، ثقافتونو، افکارو او کلتورونو د تړاو او تعامل تر ټولو غوره وسیله وبلله او ویې ویل چې د ژبې او ادب قوت انسان ته پر نورو علومو او ثقافتونو د پوهېدو او تعامل توان وربښي.
د لوړو زده کړو وزارت علمي معین د لوستو کسانو او ټولنې تر منځ پر ښو اړیکو جوړولو ټینګار وکړ او ویې ویل چې دواړه اړخونه باید په ارزښتونو کې سره تړلي وي. نوموړي د یاد کلسټر ګډونوالو ته سپارښتنه وکړه، چې په نصاب کې هغه مسایل ځای پر ځای کړي، چې د هېواد د داخلي ژبو اغېزه زیاته او د بهرنیو ژبو له اغېزې یې وساتي.
وروسته د تحصیلي نصاب د ملي کمېسیون غړي پوهندوی داود شاه فاروق د کلسټر د کار بڼې په اړه معلومات ورکړل او په دې پړاو کې یې له ټاکل شوي چوکاټ سره سم د مفرداتو پر تکمیل ټينګار وکړ.
د یادونې وړ ده چې د دې کلسټر په پنځو کاري ورځو کې به د ښوونې او روزنې څانګو د پښتو، دري، اوزبیکي، ترکمني، عربي، انګلیسي، روسي او ترکي ژبو پر نصابونو کار وشي.
