د ښوونځيو ۴۰۰ تنه فارغين ترکيې هېواد ته د خپلو زده کړو د ادامې له پاره ولېږل شول
د افغانستان پرمختګ، لوړتیا، پراختیا او نجات تر وړتیا لرونکي او کار وړ معارف پورې تړلي دي. دغه مطلب د لوړو زده کړو وزیر ډاکټر عباس بصیر په هغې غونډه کې څرګند کړ چې د افغان ترک لیسې له لوري ۴۰۰ تنه افغان متعلمین د زده کړو له پاره ترکيې ته لېږل کېدل.
په دې غونډه کې د ترکیې د پوهنې بنسټ د افغانستان څانګې رييس شاکر وایووت، د افغانستان د پوهنې وزارت معين واحدیار، په پارلمان کې د خلکو يو شمېر استازي او د افغان ترک ښوونځيو د زده کوونکو والدینو ګډون کړی و.
د افغانستان د لوړو زده کړو وزیر د خپل هېواد د دولت او ملت او ترکيې پخوانيو اړيکو ته په اشارې سره وويل چې د دوست هېواد ترکیې پرلپسې جوړوونکي فعالیتونه، د افغانستان د دولت او ملت د باور وړ وو او په دې وروستیو کلونو کې د افغان ترک ښوونځي د دوست هېواد ترکیې تر ملاتړ لاندې د ښو تعلیمي موکو په برابرولو سره د دواړو ملتونو تر منځ د دوستۍ اسباب تر پخوا ډېر پياوړي کړي دي.
ډاکټر عباس بصير زیاته کړه چې اوس مهال د زر تنو په شاوخوا کې افغان محصلین په ترکیه کې د تحصيل په بېلابېلو څانګو کې په زده کړو بوخت دي او د نوو محصلينو په جذبولو سره موږ د ترکیې هېواد د ډېرو تحصيلي همکاریو ویاړ لرو.
د لوړو زده کړو وزیر د هېواد د لوړو زده کړو په نظام کې د ځوانانو د منلو د وړتیا د محدودولو په یادولو سره، د دوست هېواد له لوری د لوړو زده کړو په برخه کې همکاري شدیده اړتیا وبلله، زیاته يې کړه چې له ډېرو دوستو هېوادونو سره يې د ډېرو تحصيلي بورسونو د ترلاسه کولو په اړه خبرې کړې دي.
ډاکټر عباس بصير په افغانستان کې د ترکيې د پوهنې له بنسټ او د ترکيې له دوست هېواد څخه د مننې په کولو سره وويل چې د افغان ترک د ۴۰۰ تنه زده کوونکو د ستایلو تر څنګ هيله لرو چې د افغانستان د ۱۳۹۹لمریز کال د کانکور د مخکښو ځوانانو له پاره یې د ۵۰ بورسونو غوښتنه وکړه. په داسې حال کې چې د ۱۳۹۹لمریز کال د کانکور عمومي اول نومره شمسیه هم ترکیې ته د زده کړو له پاره د دې ۴۰۰ تنه زده کوونکو په ډله کې ده.
ډاکټر عباس بصير زياته کړه چې د لوړو زده کړو وزارت به ډېر ژر د ترکيې هېواد په مرسته د مولانا جلال الدین محمد بلخي د اناثيه پوهنتون د چارو د پراختيا له پاره د ښځينه پاړکي د جذب اسانتیا برابره کړي او همداراز به د سیمې او نړۍ د معتبرو پوهنتونونو څانګې په هېواد کې د زده کړو او وړتیا د جوړښت په موخه ملاتړ او استقبال کړي.
په افغانستان کې د ترکيې د پوهنې بنسټ رييس شاکر وایووت د پروګرام مېلمنو ته د ښه راغلاست ویلو تر څنګ، د افغانستان او ترکيې اړيکې د وياړ وړ وبللې، ټينګار يې وکړ چې د افغانستان او ترکیې هېواد د اړيکو د سلم کال د نمانځنې په درشل کې يو او په همدې ډول به په نژدې ورځو کې د ترکيې د پوهنې بنسټ دفتر د دواړو هېوادونو تر منځ د زده کړو د پراختیا له پاره پرانستل شي.
په افغانستان کې د ترکیې د پوهنې د بنسټ رييس د بنسټ د فعالیت او هدف د تشریح کولو تر څنګ وویل چې له ۴۰۰ جذب کېدونکو متعلمينو څخه، ۳۲۲ تنه هلکان او ۸۲ تنه یې نجونې دي. نوموړي زياته کړه: «دغه پېغلې په یوه خوندي او امن سیمه کې زده کړې کوي او افغانستان ته د بېرته راتګ پر مهال کولای شي افغان کورنیو ته خپلې تجربې ولېږدوي چې د کورنیو باور د خپلو لورګانو د لېږلو له پاره زيات شي او موږ په راتلونکو کلونو کې ترکيې ته د هلکانو تر څنګ د ډېرو نجونو د لېږلو شاهدان و اوسو.
د پوهنې وزارت معین عطاء الله واحدیار د افغان ترک ښوونځي د افغان ځوانانو د وړتیا لوړوالي او پوهې د ډېرېدو سبب وبلل. نوموړي له ټولو کورنیو وغوښتل چې له پوهنې وزارت سره د خپلو اولادونو د زده کړو په برخه کې همکاري وکړي او ټول د افغانستان د نوي نسل په روزنه کې په ګډه هلې ځلې وکړي او خپل مسولیت اداء کړي.
په افغانستان کې د ترکيې د پوهنې بنسټ د همغږۍ مسوول صهیت امیري، د افغانستان پوهنې وزارت ته د افغان ترک ښوونځيو د ادارې د مسولیت له لېږد وروسته، د دې ارګان فعالیت او د منلو وړتیا یې لوړه شوه، تر دې چې د ښوونځيو شمېر له ۱۲ څخه ۲۵ته لوړ شوی او همداراز د متعلمینو شمېر یې له ۳زره څخه ۷زره ته رسېدلی.
