د کابل طبي علومو پوهنتون څخه ۴۱۸ تنه ډاکټران او ۴۰ متخصص ډاکټران فارغ او ټولنې ته خدمت لپاره وړاندې شول.
په همدې مناسبت فراغتغونډه کې د لوړو زده کړو سرپرست وزیر شیخ الحدیث مولوي نداءمحمد ندیم صاحب فارغو شویو محصلینو ته مبارکي وویله او له هغوی څخه یې وغوښتل چې په خپل مسلک کې هڅې وکړي، تر څو پر ځان بیسا او د پردیو له احتیاجه خلاص شو.
د لوړو زده کړو سرپرست وزیر وویل: «په دنیاوي علومو کې تر ټولو غوره علم طبابت دی.» نوموړي فارغ شوي ډاکټران په خپل مسلک کې کار او خدمت ته وهڅول او ډاډ یې ورکړ چې لوړو زده کړو وزارت به د لا نورو زده کړو او عملي کارونو اسانتیاوې ورته برابروي.
دغه راز د لوړو زده کړو سرپرست وزیر وویل چې نړيوال تش په نوم د بشر دوستۍ چیغې وهي، په نړۍ کې د مسلمانانو هېوادونه اشغاليږي، د همدوی د اصولو خلاف له مهاجرینو سره بد وضعیت کېږي، خو هغوی یوازې تش په نامه د خواخوږۍ پيغامونه خپروي.
وروسته د کور او ښار جوړونې سرپرست وزیر مولوي حمدالله نعماني د هېواد علمي کادرونو ته وویل چې ستاسو عزت او حیثیت په هېواد کې دننه خوندي دی او له هغوی څخه یې وغوښتل چې د خپل ولس لپاره د خدمت مصدر وګرځي.
همدارنګه په یاده غونډه کې د کابل طبي پوهنتون رئیس دوکتور مفتي اسدالله نجات، د لوړو زده کړو وزارت د دعوت او ارشاد رئیس شیخ شاکرالله وحدت، د چارو ادارې لوی رئیس شیخ نورالحق انور، د عامې روغتیا وزارت مالي او ادارې معین مولوي اسحاق صاحبزاده او نورو ویناوالو فارغو شویو محصلینو ته د مبارکي تر څنګ لازمې سپارښتنې وکړې.
د یادولو وړ ده چې کابل طبي علومو پوهنتون ۶ پوهنځی او ۶ تدریسي روغتونونه لري او هر کال سلګونه ډاکټران او متخصصین د هېواد طبي سکټور د خدمت لپاره وړاندې کوي.
