د کابل پوهنتون څلورو پوهنځيو له لوري د اوبو نړیواله ورځ ولمانځل شوه.
د کابل پوهنتون چاپېریال ساتنې، کرنې، انجنیري او ځمکپوهنې پوهنځيو له لوري د اوبو نړیوالې ورځې لمانځنې ته د اوبو او انرژۍ، کرنې، اوبو لګونې او مالدارۍ وزارتونو او همدارنګه د چاپېریال ساتنې ادارې استازي راغلي و.
په یاده لمانځغونډه کې د کابل پوهنتون علمي او محصلانو چارو مرستیالانو او د یادو وزارتونو استازو د اسلام له نظره د اوبو پر ارزښت او په کارونه کې یې د اسراف پر مخنیوي خبرې وکړې او د اوبو په سپما کې یې پر عامه پوهاوي ټینګار وکړ.
دغه راز د یادو پوهنځیو د رئیسانو او استادانو له لوري د اوبو ښه مدیریت، د افغانستان سیندیزو حوزو، د اقلیم بدلون له امله د اوبو کمښت، په کرنه او صنعت کې په معیاري ډول د اوبو پر کارونې علمي بحثونه وشول او د ګډونوالو پوښتنو ته ځوابونه وویل شول.
د یادونې وړ ده چې د غونډې په پای کې د کابل پوهنتون مسؤلینو ژمنه وکړه چې دغه پوهنتون به د اوبو او هېواد نورو مهمو موضوعاتو په اړه علمي څېړنې کوي او سکتوري وزارتونو ته به طرحې او مشورې ورکوي.
نېټه: یکشنبه
۱۴۴۵/۹/۱۴هـ.ق ۱۴۰۳/۱/۵هـ.ش ۲۰۲۴/۳/۲۴م
