د کابل پوهنتون ۴۱ اداري خالي بستونو لپاره له ۱۴۵۱ داوطلبانو څخه د ازادې سیالۍ له لارې ازموینه واخیستل شوه.
د لوړو زده کړو وزارت ازموینو کمېټې او د دغه وزارت مالي او اداري معین له لوري په کابل پوهنتون کې د یاد پوهنتون اداري خالي بستونو لپاره ازموینه واخیستل شوه.
د ازموینې په پرانیسته کې د لوړو زده کړو وزارت مالي او اداري معین مولوي حافظ محمد حامد حسیب د ازموینې پر روڼتیا خبرې وکړې او ویې ویل: «لکه څرنګه چې ازموینې ته د نوملیکنې او شارټ لیست پروسه شفافه وه، په همدې ډول به ازموینه او د پایلو اعلان شفاف وي.»
نوموړي داوطلبانو ته ډاډ ورکړ چې په ازموینه کې به وړ کسان بریالي کېږي او اداري خالي بستونو ته به لار پیداکوي.
وروسته د لوړو زده کړو وزارت مالي او اداري معین، د دغه وزارت ازموینو کمېټې، د کابل پوهنتون مسؤلينو، په ازموینه کې د ګډون کوونکو او رسنیو استازو په حضور کې د پوښتنو صندوق پرانیستل شو.
په یادو بستونو کې د درېيم، څلورم، پنځم او شپږمو رتبو بستونه شامل دي، چې د ازادې سیالۍ له لارې به پکې وړ کسانو ته د خدمت زمینه برابره شي. د یادونې وړ ده چې تر دې وړاندې لوړو زده کړو وزارت د ولایتي تحصیلي بنسټونو اداري خالي بستونو لپاره ازموینې اخیستې وې.
