له کابل پولي تخنیک پوهنتون څخه د ماسټرۍ او لیسانس په کچه ۷۵۹ انجنیران فارغ شول.
په یاده غونډه کې چې د ا.ا.ا لوړو پوړو مسولینو ګډون کړی وو، د ریاست الوزرا سیاسي مرستیال مولوي عبدالکبیر وویل چې د ا.ا.ا په مختلفو برخو کې مسلکي کادرونو ته اړتیا لري. هغه زیاته کړه چې نظام به د خدمت زمینه ورته برابروي او ملاتړ به یې کوي.
دغه راز د لوړو زده کړو سرپرست وزیر شیخ الحدیث مولوي نداء محمد ندیم په یادو مراسمو کې له فارغو شویو محصلینو څخه وغوښتل چې خپلو لوړو زده کړو ته دوام ورکړي، ماسټري او دوکتورا برنامو ته شامل شي او د خپل مسلک له لارې هېواد ته خدمت وکړي.
نوموړي زیاته کړه چې د ا.ا.ا د خپلو فارغو شویو انجنیرانو او علمي کادرونو د ظرفیت لوړونې او کار زمینې برابرولو په فکر کې دی او ویې ویل: «په نړۍ کې یوازینی کامیابه نظام هغه دی چې امیر او مشر یې د رعیت د دنیا او اخرت په فکر کې وي او دا هغه څه دي چې اسلامي امارت په عمل کې ثابت کړي دي».
همداراز د امربالمعروف او نهی عن المنکر سرپرست وزیر شیخ محمد خالد حنفي د اسلام زرین تمدن ته په اشارې سره وویل چې اسلام تر نورو ادیانو زیات د تخنیک علم ته ارزښت ورکړی دی.
همدا راز د لوړو زده کړو وزارت علمي معین دوکتور لطف الله خیرخواه، د کابل پولي تخنیک پوهنتون رئیس پوهنوال عبدالرشید اقبال او نورو ویناوالو فارغو شویو انجنیرانو او د هغوی کورنیو ته د مبارکۍ تر څنګ، په خپل مسلک کې لا زیاتې مطالعې، مهارت لوړولو او ظرفیت لوړونې ته راوبلل او ترې ویې غوښتل چې په اخلاص د خپلو خلکو او هېواد خدمت وکړي.
د یادونې وړ ده چې د کابل پولي تخنیک پوهنتون له ۷ پوهنځیو او ۱۷ څانګو څخه ۲۲۲ د ماسټري او ۵۳۷ د لېسانس په کچه محصلين فارغ او د هېواد د ودانولو لپاره ټولنې ته وړاندې شول.
