په افغانستان کې د ملګرو ملتونو پرمختیايي ادارې مرستیالې د ننگرهار پوهنتون له رئیس سره ولیدل

په افغانستان کې د ملګرو ملتونو د پرمختیايي پروګرام (UNDP) ادارې مرستیالې سریو بوزوروکوا (Surayo Buzurukova) د یوه پلاوي په مشرۍ د ننګرهار پوهنتون له رئيس پوهاند دوکتور خليل احمد بهسودوال سره وليدل.

په ياده لیدنه کې دواړو خواوو د متقابلو اړیکو او همکاریو د رامنځته کېدو د شونتیا او پیاوړتیا په اړه خبرې اترې وکړې.

د ننګرهار پوهنتون رئیس پوهاند دوکتور خلیل احمد بهسودوال راغلي پلاوي ته د ښه راغلاست تر څنګ د پوهنتون په اړه لنډ معلومات ورکړل او همدارنګه یې د پوهنتون یو شمېر وړاندیزونه، چې محصلینو ته د عملي زده کړو، فارغانو ته د انټرنشیپ زمینې برابرولو، د پوهنتون د څېړنیزو فارمونو، لابراتوارونو، کمپیوټر لیبونو تجهیزولو، د فوق لیسانس د نویو پروګرامونو رامنځته کول او مالي ملاتړ او د کرنې، انجنیري او اقتصاد پوهنځیو په برخه کې د ځینو پروژو تطبیق په کې وو، له راغلي پلاوي سره شریک کړل.

د (UNDP) ادارې مرستیالې آغلې سریو د پوهنتون مشرتابه ته په اړوندو برخو کې د مرستې ډاډ ورکړ او زیاته یې کړه، چې اداره یې په راتلونکې کې له ننګرهار پوهنتون سره د متقابلو همکاریو د رامنځته کېدو هوډ لري.

د مجلس په پای کې راغلي پلاوي د پوهنتون د مشرتابه په ملتیا د کرنې پوهنځي د څېړنیزو فارمونو څخه لیدنه وکړه، چې د کرنې پوهنځي د مسؤلینو او استادانو له خوا ورته په فارمونو کې د روانو څېړنو په اړه معلومات ورکړل شول.