په تخار پوهنتون کې پیل شوی درې ورځنی ملي کنفرانس د ۴۱ څېړنیزو مقالو په وړاندې کولو سره پای ته ورسېد.
د افغانستان په دوامداره پرمختګ کې د طبیعي زېرمو د مدیریت رول، درې ورځنی ملي کنفرانس، چې د لوړ زده کړو وزارت په همکارۍ او د تخار پوهنتون په کوربه توب دایر شوی و، د تخار پوهنتون د رهبري پلاوي او د استازانو او ګډونوالو په ویناوو پای ته ورسېد.
د یاد کنفرانس د پای مراسمو کې د تخار پوهنتون رئیس مولوي کمال الدین منیب د خپلو خبرو پر مهال د دغه کنفرانس په لاره اچولو له امله د لوړو زده کړو وزارت له رهبرۍ او همدارنګه د استادانو او ټولو ګډونوالو له راتګ مننه او قدرداني وکړه.
همدارنګه د استادانو او ټولو مېلمنو په استازولۍ د کندهار پوهنتون د څېړنو مرستیال پوهندوی کمال الدین کمال او د جوزجان پوهنتون د څېړنو مرستیال پوهنمل دوکتور عبدالبصیر محمود، د تخار پوهنتون د رهبرۍ له مېلمه پالنې څخه قدرداني وکړه، د تحصیلي بنسټونو د پرمختګ په برخه کې یې د ا.ا.ا او د لوړو زده کړو وزارت له رهبرۍ څخه د مننې ترڅنګ، غوښتنه وکړه چې د دغه ډول کنفرانسونو او د استادانو او څېړونکو د څېړنو پایلې له نورو اړوندو وزارتونو سره شریکې کړي.
همدا راز د تخار پوهنتون د څېړنو مرستیال پوهندوی دوکتور عبدالرحمن پژواک د کنفرانس د کاري پروسې لنډ راپور وړاندې کړ.
په پای کې یاد کنفرانس د لوړو زده کړو وزارت رهبري پلاوي ته د تندیسونو او څېړونکو او استادانو ته د تصدیق پاڼو په ویشلو سره پای ته ورسېد.
نېټه: پنجشنبه
۱۴۴۶ هـ.ق د ربیع الثاني ۲۸ مه
۱۴۰۳ هـ.ش د عقرب ۱۰ مه
۲۰۲۴ م د اکتوبر ۳۱ مه
