په کابل پوهنتون کې (د علمي کنفرانس طرحه او دائرول) په نوم یو ورځنی ورکشاپ د کابل پوهنتون د تحقیق او نوښت معاونیت لخوا د لوړو زده کړو وزارت د تحقیق، تألیف او ترجمې ریاست په همکارۍ دائر شو.

په دغه ورکشاپ کې چې د امارتي مرکزي او ولایتي پوهنتونونو رئسیانو او تحقیقي مسؤلینو ګډون کړی و، د لوړو زده‌کړو وزارت علمي معین دوکتور لطف الله خیرخواه او د کابل پوهنتون رهبرۍ په حضور کې وړاندې شو.
په پیل کې د تحقیق، تألیف او ترجمې ریاست رئیس دوکتور حمیدالله مزمل په څېړنیزو قواعدو او دستورالعملونو کې د رامنځته شویو بدلونونو په اړه خبرې وکړې او وویل چې نوموړو بدلونونو استادانو ته په څېړنیزو برخو کې ډېرې اسانتیاوې برابرې کړې دي.
وروسته د لوړو زده کړو وزارت مالي، اداري او حسابي رئیس عبدالباري خپلواک د علمي کنفرانسونو د دائرولو په مالي لګښتونو وغږید او وویل چې هره څېړنېزه برنامه مالي لګښت ته اړتیا لري او وزارت د علمي کنفرانسونو له څېړنېزو لګښتونو څخه ملاتړ کوي او په دې برخه کې د تحصیلي بنسټونو سره همغږی دی، نوموړي زیاته کړه چې تر اوسه په يوولسو تحصیلي بنسټونو کې د څېړنو مرکزونه تجهیز شوي دي او په پلان کې ده چې د افغانستان د ټولو تحصیلي بنسټونو څېړنیز مرکزونه تجهیز کړو.
ورپسې د کابل پوهنتون د علمي مجلو او تحقیقاتو امر پوهندوى دوکتور محمد ولی سالاري له لورې د علمي کنفرانس د طرحې څرنګوالي او دائرولو په اړه سمینار وړاندې شو، نوموړي د علمي کنفرانسونو د موخو، ګټو، مرحلو او ډولونو او یو څو نورو موضوعاتو په اړه لکچر ورکړ او همداراز یې د افغانستان د پوهنتونونو علمي رتبه بندي روښانه کړه.
 په پای کې ګډونوالو د ورکشاپ په اړه سوالونه او نظرونه مطرح کړل او د مسؤلینو لخوا ځوابونه ورکړل شول.